A si lo. Baibal nih Jesuh min in Pathian sin lawngah thla kan cam awk a si tiah a ti. Jesuh nih a zultu kha hitin a ti hna: “Hi bantuk hin thla cu nan cam awk a si: ‘Vancung khua i a um kan Pa, Na min thiang cu upat si ko seh.’” (Matthai 6:9) Mithiang mi, vancungmi asiloah a dang pakhatkhat sinah thlacam dingin Jesuh nih a zultu pawl kha a cawnpiak bal hna lo.

 Jesuh nih a zultu pawl kha hitin zongin a ti hna: “Lam le biatak le nunnak cu keimah hi ka si; keimah sinin ti dah lo cun ahohmanh Pa sin an phan kho lo.” (Johan 14:6) Jesuh lawnglawng hi kan caah Pathian sinah a kan nawlpiak khotu a si.—Hebru 7:25.

Pathian sin thla kan cam buin mithiang mi hna sinah thla kan cam ah tah?

 Nawlbia Pahra lakin pakhat ah Pathian nih hitin a ti: “Keimah hi BAWIPA nan Pathian cu ka si i nahchuah a ngeimi Pathian ka si.” (Exodus 20:5) Zeiti lam in dah Pathian cu ‘nahchuahnak a ngeih’? New American Bible i a tanglei fianternak nih Pathian cu “zumhawktlak tein um awkah a halmi” a si tiah a ti. Pathian nih a sinah direct in thlacamnak i telin lungthin dihlak in amah biak awkah a kan hal.—Isaiah 48:11.

 Mithiang mi, vancungmi asiloah pakhatkhat sinah thla kan cam ahcun Pathian a thin a hung lai. Lamkaltu Johan nih vancungmi pakhat kha biak dingin aa timh tikah vancungmi nih hitin a thlauh: “Bawk hlah. Keimah zong nangmah bantukin Pathian sal ka si ve, Jesuh nih a phuanmi biatak aa tlaihmi nan unau hna lak i pakhat ka si ve. Pathian tu bia tuah.”—Biathlam 19:10.