Nausem chuah asiloah “nau hrawhnak” timi biafang cu Baibal ah a um lo. Asinain a chuak rih lomi naute i telin minung nunnak kha Pathian nih zeitindah a hmuh ti a langhtermi Baibal caang tampi a um.

 Nunnak cu Pathian sinin hmuhmi laksawng a si. (Genesis 9:6; Salm 36:9) Nu paw chungah a ummi naute i telin nunnak vialte kha Pathian nih a sunsak. Cucaah a chuak rih lomi naute a thih nakhnga hramhram in tuah cu lainawn a si.

 Israel mi sin pekmi Pathian Nawlbia nih hitin a ti: “I vuak i velhnak hmun ah fapawi nu pakhatkhat kha pa pakhatkhat nih a tuk i a mah cu a thi lo nain a fa kha a rawh ahcun a tutu pa kha a tukmi nu i a va nih ka liamh seh a ti zat paohin dantat a si lai i biaceihtu hna nih cawi seh an timi zat in a cawi lai. Sihmanhsehlaw a thih ahcun dantatnak cu nunnak caah nunnak ve . . . a si lai.”—Exodus 21:22, 23. a

•  Minung nunnak cu zeitik in dah aa thawk?

•  Nau aa hrawk balmi kha Pathian nih a ngaithiam lai maw?

•  A nu asiloah naute nunnak caah ṭih a nun tikah nau hrawh cu a palh maw?

 Nau aa sem cangka in Pathian nih nunnak a ngeimi in a hmuh cang. A chuak rih lomi naute kha mi pakhat in Pathian Bia, Baibal nih a langhter tawn. Nu paw chung i naute nunnak le a chuak cangmi naute nunnak cu aa khat in Pathian nih a hmuh ti a langhtermi tahchunhnak cheukhat kha zohhmanh u.

•   Thiang thlarau forhfialnak thawngin Siangpahrang David nih hitin a ti: “Ka chuah hlanin na rak ka hmuh diam cang.” (Salm 139:16) Pathian nih David kha a chuah hlanin mi pakhat in a hmuh cang.

•   Jeremiah cu a chuah hlanin profet a si lai ti kha Pathian nih a hngalh cang. Pathian nih hitin a ti: “Paw chung i kaan ser hlanah kaan hngalh i na chuah hlanah kaan thianter cang; nangmah cu miphun hna ca i profet ah kaan chiah cang.”—Jeremiah 1:5.

•   Baibal ṭialtu siibawi Luka nih a chuak rih lomi naute ca le a chuak kami naute caah Greek biafang pakhat kha a hman.—Luka 1:41; 2:12, 16.

 Nau aa hrawk balmi hna nih Pathian ngaihthiamnak kha an hmuh khawh. Nunnak kha Pathian hmuh ningin an hun hmuh tikah sualnak ka ngei timi ruahnak an ngeih awk a si ti lo. “BAWIPA cu zaangfahnak le dawtnak in a khat. . . . Nichuahlei le nitlaklei an i hlat tluk khin kan sualnak cu kanmah he i hlat ah a kan ṭhialpiak.” (Salm 103:8-12) Nau hrawhnak i telin hlanah rak tuahmi sualnak caah lungtak in aa ngaichihmi hna kha Jehovah nih a ngaihthiam hna lai.—Salm 86:5.

 A chuak rih lomi naute nunnak he aa tlaiin Baibal chimmi kha na hngalh cang ahcun a nu asiloah naute nunnak caah ṭih a nung timi ruang men ah nau naa hrawk lai lo.

 Nau hrin lioah a nu nunnak le naute nunnak ah pakhatkhat thim a hau timi lakhruak in a cang khomi thil sining nan ton ah tah zeitin? Cu bantuk thil sining a tongmi hna nih anmah tein biakhiahnak an tuah awk a si.