Baibal ah “[atu] hi vawlei chan donghnak” asiloah “vawlei donghnak caan” ah a cang dingmi thil sining le lungput kong hna kha a langhter. (Matthai 24:3; King James Version) Mah caan kha Baibal nih “ni hmanung bik caan” asiloah “donghnak caan” tiah a auh.—2 Timote 3:1; Daniel 8:19.

 Baibal nih ni hmanung bik caan ah kan nung cang ti a langhtermi “hmelchunhnak” le caankhatte ah a cang dingmi thil kong kha a chimchung. (Luka 21:7) Tahchunhnak cheukhat kha zohmanh hna u sih:

 Vawleicung pumpi ah raltuknak. Jesuh nih hitin a chimchung: “Ramkhat le ramkhat an i do lai, pengkhat le pengkhat an i tu lai.” (Matthai 24:7) Biathlam 6:4 ah “vawleicung i ral thawhternak ṭhawnnak” an pekmi, raltuknak hmelchunhnak a simi rang aa citmi mi pakhat kong zong a chimchung.

 Mangṭam. Jesuh nih hitin a chimchung: ‘A kenkip ah mangṭam a tlung lai.’ (Matthai 24:7) Biathlam Baibal ah ram kip ah mangṭam a tlung lai ti a langhtermi a dang rang aa citmi mi pakhat kong zong kha a chimchung.—Biathlam 6:5, 6.

 A fakmi lihnin. Jesuh nih ‘a kenkip ah lihnin a tlung lai’ tiah a ti. (Matthai 24:7; Luka 21:11) Vawleicung pumpi ah ṭih a nungmi lihnin ruangah mi cu hlan nakin harnak tam deuh an tong lai i an thi lai.

 Zawtnak. Jesuh chimmi ningin “ngal-eu zawtnak” hna a tlung lai.—Luka 21:11.

 Zaangennak. Kumzabu tampi chung zaangennak cu a rak um ko nain Jesuh nih ni hmanung bik ahcun “ṭhatlonak kha a karh tuk lai” tiah a chimchung.”—Matthai 24:12.

 Vawlei hrawhnak. Biathlam 11:18 ah mi nih ‘vawlei an hrawh’ lai tiah a chimchung. Puarhrannak le ziknawh einak ti bantuk tuahsernak lawng si loin kokek thil hrawhnak ti bantuk lam a phunphun zongin vawlei kha an hrawh lai.

 A ṭhalomi lungput. 2 Timote 3:1-4 ah “mi cu . . . lawmh a hngal lomi le biaknak zeihmanh i a rel lomi an si lai; zaangfahnak an ngei lai lo, mi zawnruahnak an ngei lai lo, mi thangchiat duhmi an si lai, ruru-hranghrang in khua a sami an si lai i ṭih a nungmi an si lai; ṭhatnak kha an huat lai; hawi rawi a hmangmi an si lai, duhpaoh khuasa an si lai i porhlawtnak in an khat lai” tiah a chimchung. Mi nih mah a ṭhalomi lungput kha an langhter lai caah mah caan cu “harnak caan” tiah auh a si lai.

 Chungkhar i ṭhencheunak. 2 Timote 3:2, 3 ah mi tampi nih an chungkhar cungah ‘zaangfahnak an ngeih lai lonak’ kong le an fale nih ‘an nu le an pa an zomhtaih hna lainak’ kong kha a chimchung.

 Pathian an dawtnak a zor lai. Jesuh nih hitin a chimchung: “Mi tampi cu an dawtnak kha a kik lai.” (Matthai 24:12) Mi tam deuh nih Pathian dawtnak an ngeih lai lonak kong kha a chim duhmi a si. Cu bantukin 2 Timote 3:4 zong ah ni hmanung bik ahcun mi nih “Pathian nakin nuamhnak kha an duh deuh lai” tiah a ti.

 Biaknak pawl i an i titernak. 2 Timote 3:5 ah mi nih a lenglei lawngin Pathian kha an biak lai i a phunglam ningin an nung lai lo tiah a chimchung.

 Baibal chimchungbia pawl hngalhthiam deuhnak. Daniel Baibal ah “donghnak caan” ah mi nih chimchungbia kong kha ṭha tein an hun hngalhthiam lai i a hmaanmi Baibal hngalhnak cu a karh lai tiah a chimchung.—Daniel 12:4.

 Vawleicung pumpi phungchimnak. Jesuh nih hitin a chimchung: “Vancung Pennak kong thawngṭha hi khuazakip ah chim a si lai.”—Matthai 24:14.

 Zeirel lonak le nihsawhnak a karh lainak. Jesuh nih hi vawlei a dong cang lai ti a langhtermi thil hna kha mi nih zei ah an rel lai lo tiah a chimchung. (Matthai 24:37-39) Mah lengah 2 Peter 3:3, 4 ningin nihsawhtu cheukhat nih langhtertu thil hna kha an zum lai lo.

 Chimchungbia dihlak a tlinnak. Jesuh nih ni hmanung bik ah cun mah chimchungbia hna hi tlawm tete asiloah tampi in a tling lai tiah ti loin caankhat te ah an tling dih lai tiah a ti.—Matthai 24:33.

 Kan nung cang. Vawlei thil sining le Baibal chung i nithla hna ningin ni hma nung bik caan cu Vawlei Ralpi I aa thawk kum, 1914 in aa thawk ti cu a fiang. Vawlei thil sining nih donghnak caan ah kan nung cang ti a langhter ning kong hngalh awkah a tanglei i video hi zoh:

 1914 ah Pathian Pennak nih vancung in uk hram a thawk. A hmasa bik ah Satan le a khuachia pawl cu vancung in thlak an si i vawleicung lawngah cawlcangh khawhnak nawl pek an si. (Biathlam 12:7-12) Mi pawl i an lungput le an tuahsernak zoh tikah Satan nih huham a iap hna ti kha hmuh khawh a si. Cucaah ni hmanung bik ni cu “harnak caan” a sinak a si.—2 Timote 3:1.

 Atu bantuk harnak caan ah mi tampi cu lungrethei in an um. Minung bu pehtlaihnak a rawk dih lai ti kha an phang. Mi cheukhat cu minung ca i hmailei kong hmanhah ṭihnak an ngei.

 Caankhatte ah vawlei thil sining ruangah an lungre a thei ko nain hmailei kong ah a ṭha tukmi ruahchannak a ngeimi zong an um. Annih nih a rauhhlan ah Pathian Pennak nih vawleicung buaibainak vialte a hrawh dih cang lai ti kha an zumh. (Daniel 2:44; Biathlam 21:3, 4) Pathian biakam a tlin lai caan kha lungsau tein an hngah i Jesuh chimmi mah bia in hnemhnak an hmu: “A dongh tiangin a fekmi cu khamh an si lai.”—Matthai 24:13; Mikah 7:7.