Mi nih nunnak sullam kha hngalh an duh caah Minung hi zeitindah kan hun chuah? Nun hnawh chanmi kan ngei maw? tiah biahalnak an tuah. Baibal nih nunnak i aa tinhnak cu Pathian he i hawikomhnak ser ding kha a si tiah a langhter. Baibal nih a langhtermi a hrampi biatak cheukhat hi ruathmanh.

•   Pathian cu a kan Sertu a si. Baibal nih hitin a ti: “A kan sertu cu amah [Pathian] a si i kannih cu amah ta kan si.”​—Salm 100:3; Biathlam 4:11.

•   Pathian nih kanmah i telin a sermi thil vialte caah tinhnak pakhat a ngei.​—Isaiah 45:18.

•   Pathian nih “thlarau ah michambau” kan si timi hngalhnak he a kan ser. Mah ah nunnak a sullam hngalh duhnak lungthin aa tel. (Matthai 5:3) Mah kan duhnak kha tlinter a duh.​—Salm 145:16.

•   Pathian he hawikom kan sernak thawngin thlaraulei kan chambaunak kha kan tlinter khawh. Pathian he hawikom ser timi cu mi cheukhat caah cun a si kho lomi a lo, asinain Baibal nih hitin a kan forh: “Pathian cu naih u law aan naih ve hna lai.”​—Jeim 4:8; 2:23.

•   Pathian hawi si khawh awkah kan ca i aa tinhnak he aa tlakin kan nun a hau. Phungchimtu 12:13 ah mah aa tinhnak he aa tlaiin hitin a ti: “Pathian cu ṭih law a nawlbia kha zul hna, zeicahtiah minung cu hi nawlbia hna tuah awk caah hin pei rak ser a si cu.”

•   Hmailei ah Pathian nih sifah harnak vialte a donghter i amah a biami a hawikom pawl zungzal nunnak a pek hna tikah minung ca i a hramthawk Pathian tinhnak a tlinmi kha kan hmuh lai.​—Salm 37:10, 11.