A um, Baibal nih Pathian a um ti fiang tein a langhtermi thil hna kha a kan chimh. Biaknak cawnpiaknak ruangah Pathian a um tiah zumh thlorh in zumh si loin “tuaktan khawhnak” le “hngalhnak” kha hmangin zumh awkah Baibal nih a kan forh. (Rom 12:1, NW; 1 Johan 5:​20) Baibal ah hram aa bunhmi a tanglei kong hna hi ruathmanh:

• Thilnung pawl i telin van le vawlei ningcang tein ser a simi nih Sertu a um ti kha an langhter. Baibal nih hitin a ti: “Nan hngalh cio bangin inn cu mi nih an sak taktak—zeizong vialte a satu bel Pathian a si.” (Hebru 3:4) Mah ruahnak cu a sawhsawh te a si ko nain mifim tampi nih sullam a ngei tukmi a si ti kha an hngalh. a

• Minung nih nunnak sullam le aa tinhnak kong kha hngalh duhnak lungput kan ngei, a hlawh a tlingmi hmanh nih mah kong kha hngalh an duh. Cutin hngalh kan duhmi cu “thlarau ah mi chambau kan si” ti kan i hngalh a si tiah Baibal nih a ti. Mah ah Pathian hngalh duhnak le biak duhnak lungput aa tel. (Matthai 5:3; Biathlam 4:​11) Mah nih Pathian a um ti lawng si loin kan herhmi pek a duhmi, dawtnak a ngeimi Sertu a si ti zong a langhter.​—Matthai 4:4.

• Kumzabu tampi lioah rak ṭialmi Baibal chimchungbia hna cu a dikthliar in a tling. A hmaan i a neknok tiangin chimchungmi mah bia hna nih minung nakin a ṭhawng deuhmi sinin a rami an si kha fiang tein an langhter.​—2 Peter 1:​21.

• Baibal ṭialtu hna cu an chan mi hna nakin science lei fimnak an ngei. Tahchunhnak ah, hlanlio chan i mi tampi nih vui, ngal asiloah cawtum ti bantuk saram pakhatkhat nih vawlei kha a phorh tiah an zumh. Asinain Pathian nih “vawlei cu zeihmanh lo chungah a thlai” tiah Baibal nih a ti. (Job 26:7) Cu bantukin vawlei pungsan he aa tlai zongin Baibal nih “vawlei pum” tiah hmaan tein a rak langhter. (Isaiah 40:22, NW) Baibal ṭialtu hna nih cu bantuk hngalhthiamnak hna cu Pathian sinin an hmuhmi a si tiah mi tampi nih an cohlanmi cu aa tlakmi a si.

• Baibal nih a harmi biahalnak tampi kha a phi a pek, cu bantuk biahalnak i a phi kha lungtling lak in an hmuh lo tikah Pathian a um lo timi zumhnak a ngeihter hna. Tahchunhnak ah: Pathian cu dawtnak a ngeimi le a ṭhawngmi a si ahcun zeicah vawleicung ah harnak le ṭhatlonak hna a um? Biaknak nih zeicah mi kha thilṭha nakin thilṭhalo a tuahter deuh hna?​—Titas 1:​16.