Pathian Cu Khoika Hmun Paohah A Um Maw?
Baibal chimmi
Pathian nih zeizong vialte kha a hmuh khawh dih i khoika hmun paohah a duh ningin thil a tuah khawh. (Phungthlukbia 15:3; Hebru 4:13) Asinain Baibal nih Pathian cu khoika hmun paohah a um tiah a chim lo. Mah canah Pathian cu mi pakhat a si i a umnak hmun pakhat a um tiah a ti.
Pathian muisam: Pathian cu thlarau pum a si. (Johan 4:24) Minung nih Pathian kha kan hmu kho lo. (Johan 1:18) Baibal tuanbia i langhnak hna ah Pathian cu hmun pakhat ah a ummi in an langhter zungzal. Pathian kha khoika hmun paohah a ummi in an langhter bal lo.—Isaiah 6:1, 2; Biathlam 4:2, 3, 8.
Pathian umnak hmun: Mit in hmuh khawh lonak thlarau pum pawl umnak hmun ah Pathian cu a um. Cuka ah Pathian “umnak hmun van” a um. (1 Siangpahrang 8:30) Voikhat cu thlarau pum a ngeimi vancungmi hna cu ‘Pathian hmaiah’ an chuak tiah Baibal nih a ti caah Pathian nih umnak hmun pakhat a ngei ti kha kan hngalh.—Job 1:6.
Pathian cu khoika hmun paohah a ummi a si lo ahcun pumpak pakhat cio kha a kan zohkhenh kho lai maw?
Pathian nih pumpak pakhat cio kha ṭha tein a kan zohkhenh khawh. Pathian cu van ah a um ko nain a duhnak a tuahmi hna kha a hmuh hna i an ca ṭhatnak kha a tuahpiak hna. (1 Siangpahrang 8:39; 2 Chanrelnak 16:9) Jehovah nih lungtak tein amah a biami a zohkhenh hna ning hi ruathmanh:
Thla cam tikah: Thla kan cam tikah Jehovah nih a kan ngaihpiak.—2 Chanrelnak 18:31.
Lungretheih tuk tikah: “Lung a dongmi kha BAWIPA nih a umpi hna i ruahchannak a ngei lomi kha a khamh hna.”—Salm 34:18.
Lamhruainak a herh tikah: Jehovah nih a bia, Baibal hmangin ‘kan zulh awk hnga lam kha a kan hmuhsak lai.’—Salm 32:8.
Khoika hmun paohah a um timi kong he aa tlaiin a hmaan lomi ruahnak hna
A hmaan lomi ruahnak: Pathian cu a thil sermi khoika hmun paohah a um.
A hmaanmi: Pathian cu vawleicung ah le mit in hmuh khawhnak van le vawlei i khoika hmun hmanhah a um lo. (1 Siangpahrang 8:27) Arfi le a dang sermi thil hna nih ‘Pathian sunparnak fiang tein an langhter’ ti cu a hmaan ko. (Salm 19:1) Zuk suaitu pakhat cu a suaimi zuk chungah a um lo bantukin Pathian zong a sermi thil hna chungah a um lo. Zuk suaimi nih a suaitu kong a kan hngalhter khawh bantukin hmuh khawhmi sermi thil hna nih Sertu i a ṭhawnnak, a fimnak le a dawtnak ti bantuk “hmuh khawh a si lomi a sining” hna a kan hngalhter.—Rom 1:20.
A hmaan lomi ruahnak: Pathian nih zeizong vialte a hngalh khawh nakhnga le a tuah khawh nakhnga khoika hmun paohah a um a hau.
A hmaanmi: Pathian thiang thlarau cu zeizong vialte a tuah khotu Pathian ṭhawnnak kha a si. Pathian cu a thiang thlarau thawngin zeitik caan paoh le khoika hmun paohah a cangmi thil vialte kha a hngalh dih i a tuah khawh, cuka theng ah um a hau lo.—Salm 139:7.
A hmaan lomi ruahnak: Salm 139:8 nih “vancung ah khin hung kai ning tiah, cuka ah cun na rak um ko lai, mithi khua ah khin vung it ning tiah, cuka zongah cun na rak um ṭhiamṭhiam ko lai” a ti caah Pathian cu khoika hmun paohah a um tinak a si.
A hmaanmi: Mah Baibal caang nih Pathian umnak hmun kong kha a chimmi a si lo. Minung bawmh awkah Pathian caah aa hlat tuknak hmun a um lo ti kha biazai phun in a langhtermi a si.
Mah Kong Hna Zong Hi Na Duh Khawh Men
BAIBAL CAWNPIAKNAK AH A HERHMI
Pathian Cu A Um Taktak Maw?
Pathian zumhnak cu aa tlakmi a si ti a langhtermi thil hna kha hlathlai.
BAIBAL BIAHALNAK A PHI
Thiang Thlarau Timi Cu Zeidah A Si?
A ruang ṭha a um caah Baibal nih thiang thlarau kha Pathian “kut” in a langhter.
KAN KONG
Rak Len Dingin Halnak
Baibal biahalnak kong kha i ruah u asiloah Jehovah Tehte Hna kong kha tam deuh in hlathlai.