Pathian Pennak timi cu Jehovah Pathian nih a dirhmi cozah taktak kha a si. “Pathian pennak” kha “vancung pennak” ti zongin auh a si, zeicatiah vancung in a uk lai caah a si. (Marka 1:14, 15; Matthai 4:17) Pathian Pennak cu lam a phunphun in minung cozah he aa lo, asinain minung cozah nakin a let tampi in a ṭha deuh.

• Uktu hna. Pathian nih Jesuh Khrih kha a Pennak ah Siangpahrang in rian a pek i minung uktu hna nakin a sang deuhmi nawlngeihnak a pek. (Matthai 28:18) Jesuh nih a nawlngeihnak kha a ṭhatnaklei in a hman. Zumhawk a tlakmi le zaangfahnak a ngeimi Hruaitu a si kha a rak langhter. (Matthai 4:23; Marka 1:40, 41; 6:31-34; Luka 7:11-17) Pathian lamhruainak tangah Jesuh nih vancung ah amah he ‘vawlei a ukṭi’ dingmi hna kha miphun zakip chungin a thim hna.—Biathlam 5:9, 10.

• Uknak Caan. Aa thleng lengmangmi minung cozah he i lo loin, Pathian Pennak cu “zeitikhmanh ah a rawk lai lo.”—Daniel 2:44.

• Rammi. Zei bantuk miphun an si ah, khoika a ummi an si ah Pathian duhnak a tuahmi poah cu Pathian Pennak rammi an si kho.—Lamkaltu 10:34, 35.

• Upadi. Pathian Pennak i upadi (asiloah nawlbia) nih ṭhatlonak tuah kha thlauh lawng si loin rammi pawl i an ziaza zong a ṭhatter chin. Tahchunhnak ah, Baibal nih hitin a ti: “‘Bawipa na Pathian cu na lungthin dihlak le na ruahnak dihlak le na nunnak dihlak in na dawt lai,’ ti hi a ngan bik le a biapi bik nawlbia cu a si. A hun changtu biapi bik nawlbia cu, cu bantuk ṭhiamṭhiam cu a si i, ‘Na innpa cu nangmah naa dawt bantukin na dawt lai,’ ti hi a si.” (Matthai 22:37-39) Pathian le innpa dawtnak nih midang ca ṭhatnak tuah awkah Pennak rammi hna kha a forh hna.

• Fimcawnnak. Pathian Pennak nih rammi hna caah a sangmi ziazalei phunglam a chiah i mah phunglam ningin nun awkah a cawnpiak hna.—Isaiah 48:17, 18.

• Rian. Pathian Pennak cu rammi pawl kha fahnak a pe i uktu pawl a rumtermi a si lo. Mah canah Pathian a dawmi hna cu vawleicung paradis ah zungzal in an nung lai timi biakam i telin Pathian duhnak kha a tlinter lai.—Isaiah 35:1, 5, 6; Matthai 6:10; Biathlam 21:1-4.