Baibal nih donghnak caan ah zawtnak (pul rai i telin chawnh khawhmi zawtnak) a tlung lai tiah a chimchung. (Luka 21:11) Cu bantuk pul rai cu Pathian sinin a rami dantatnak a si lo. A tak ti ahcun a Pennak thawngin Pathian nih a rauhhlan ah pul rai i telin zawtnak vialte kha a hloh dih cang lai.

•  Baibal nih pul rai he aa tlaiin a chimchung maw?

•  Pathian nih zawtnak in mi kha dan a tat bal hna maw?

•  Tuchan i pul rai cu Pathian sinin a rami dantatnak a si maw?

•  Pul rai hi a dong te lai maw?

•  Zawtnak he aa tlaimi Baibal caang hna

Baibal nih COVID-19, AIDS le Spain raifanh ti bantuk pul rai asiloah zawtnak he aa tlaiin cuset khaset in cun a chimchung lo. Asinain “ngal-eu zawtnak” le “rai” a tlung lai tiah a chimchung. (Luka 21:11; Biathlam 6:8) Mah cu “ni hmanung bik” asiloah “atu chan donghnak ding hmelchunhnak” lakah aa telmi an si.—2 Timote 3:1; Matthai 24:3.

Thil sining cheukhat ah Pathian nih mi pawl dantat awkah zawtnak a hmannak kong kha Baibal nih a langhter. Tahchunhnak ah, mi cheukhat kha thinghmui zawtnak in dan a tat hna. (Nambar 12:1-16; 2 Siangpahrang 5:20-27; 2 Chanrelnak 26:16-21) Asinain cu bantuk dantatnak cu sualnak a ngei lomi hna cungah a tlung lo. Mah canah Pathian a ralchanhmi hna cung lawngah a tlungmi dantatnak a si.

A si lo. Mi cheukhat nih mi pawl dantat awkah Pathian nih pul rai le a dang zawtnak hna a hman tiah an ti. Asinain Baibal nih cutin a chim lo. Zeicah?

A ruang pakhat cu hlanlio ah siseh, atu ah siseh Pathian a biami cheukhat cu zawtfahnak an tong. Tahchunhnak ah, zumhfekmi Timote cu ‘a paw a fak lengmang.’ (1 Timote 5:23) Asinain Baibal nih mah cu Pathian mithmaiṭha sunghnak hmelchunh a si tiah a chim lo. Cu bantukin tuchan i zumhfekmi Pathian salle cheukhat zong zawtfahnak an tong. Thil sining tam deuh ahcun aa tlak lomi caan le aa tlak lomi hmun i an um caah a si.—Phungchimtu 9:11.

Mah lengah Pathian nih mi ṭhalo pawl dan a tat hna lainak caan cu a phan rih lo tiah Baibal nih a kan cawnpiak. Mah canah kannih cu “khamhnak hmuh ni” ah kan nung​—mah cu Pathian nih amah he i naih awk le khamhnak hmuh awkah mi vialte a sawm hnanak caan kha a si. (2 Korin 6:2) Cutin a sawm hnanak lamkhat cu vawleicung pumpi ah “Pennak kong Thawngṭha” chimnak thawngin a si.”​—Matthai 24:14.

A dong lai. Baibal nih zawtnak a um ti lai lonak caan a phan lai tiah a chimchung. A Pennak uknak tangah Pathian nih zawtnak vialte a hloh dih cang lai. (Isaiah 33:24; 35:5, 6) Ngaihchiatnak, fahnak le thihnak hna a hloh dih cang lai. (Biathlam 21:4) Cun a thimi hna zong kha a tlingmi uknak tang i hi vawlei ah ngandam tein an nun khawh nakhnga a thawhter ṭhan hna lai.—Salm 37:29; Lamkaltu 24:15.

Biathlam 6:8: “Ka hun zoh i rang rau diapduap pakhat ka hmuh. A cung i aa citmi cu a min ah Thihnak a si i Hell nih a hnulei in a zulh. . . . uknak nawl kha pek an si i . . . rai in . . . mi thah khawhnak nawl kha pek an si.”

A sullam: Biathlam cauk chung i rang aa citmi pali nih atu kan chan ah a tlung dingmi rai hna kha an langhter.