Adam le Evi cu hmasa bik sualnak a tuahmi minung an si. “A ṭha le a ṭhalo hngalhnak pe khotu thingkung a tlai” an einak thawngin Pathian nawl an rak buar. Mah tikah mi tampi nih sualnak hrampi a tiah auhmi sualnak kha an rak tuah. (Genesis 2:16, 17; 3:6; Rom 5:19) Mah thingkung i a tlai kha Adam le Evi nih einak nawl an ngei lo, zeicatiah minung caah a ṭha le ṭhalo he aa tlaiin Pathian nih biakhiahnak nawl a ngeihmi kha mah nih a aiawh caah a si. Adam le Evi nih mah thingkung a tlai an einak thawngin a ṭha le ṭhalo kong ah anmah tein biakhiahnak tuah dingin an i thim. Cutin an tuahmi cu Pathian nih a ṭha le ṭhalo kong i biakhiahnak nawl a ngeihmi kha an hlawt a si.

•  “Sualnak hrampi” nih Adam le Evi kha zeitindah a hnorsuan hna?

•  “Sualnak hrampi” nih zeitindah a kan hnorsuan?

•  “Sualnak hrampi” ruangah a chuakmi thil in kan luat kho maw?

•  “Sualnak hrampi” he aa tlaimi a hmaan lomi ruahnak

Adam le Evi nih sualnak an tuah caah an hung tar i a donghnak ah an thi. Pathian he an i pehtlaihnak kha an hrawh i a tlingmi ngandamnak he zungzal nunnak kha an sung.—Genesis 3:19.

Adam le Evi nih sualnak a ngeimi an sinak kha an tefa vialte sinah an roh hna. Mah cu nulepa nih cikor chambaunak an rohmi hna bantuk a si. (Rom 5:12) Cucaah mi vialte cu kan chuahka in “misual” b kan si, chim duhmi cu mitlinglo in hrin kan si caah thil ṭhalo tuah kha kan i fawih tinak a si.—Salm 51:5; Efesa 2:3.

Ro kan comi sualnak le tlinlonak ruangah kan zaw, kan hung tar i kan thi. (Rom 6:23) Cun kanmah le midang tuahmi sualnak ruangah a chuakmi harnak zong kan tong.—Phungchimtu 8:9; Jeim 3:2.

Kan luat kho. Jesuh nih “kan sualnak ngaihthiamnak ding caah” raithawinak in a nunnak a pek tiah Baibal nih a ti. (1 Johan 4:10) Jesuh raithawinak nih kan comi sualnak ruangah a chuakmi thilṭhalo in a kan luatter khawh i Adam le Evi nih an sunghmi, a tlingmi ngandamnak he zungzal nunnak kha a kan ngeihter ṭhan khawh.—Johan 3:16. c

A hmaan lomi ruahnak: Sualnak hrampi ruangah Pathian he pehtlaihnak ṭha zeitikhmanh ah kan ngei kho lo.

A hmaanmi: Adam le Evi nih an tuahmi thil ruangah Pathian nih a kan mawhchiat lo. Mitlinglo kan si kha a hngalhthiam i kan tuah khawhmi lengin kan sinin aa ruahchan lo. (Salm 103:14) Kan comi sualnak ruangah harnak kan ton hmanhah Pathian he pehtlaihnak ṭha ngeih dingin caanṭha le tinvo sung kan ngei.—Phungthlukbia 3:32.

A hmaan lomi ruahnak: Tipil innak nih mi pakhat kha sualnak hrampi in a luatter caah bawhte zong tipil an in awk a si.

A hmaanmi: Tipil innak cu khamhnak hmuhnak caah a biapi tukmi kehlan a si ko nain Jesuh raithawinak zumhnak lawng nih mi pakhat kha sualnak in a thianh khawh. (1 Peter 3:21; 1 Johan 1:7) A hmaanmi zumhnak cu hngalhnak cungah aa hngatmi a si caah bawhte nih cu bantuk zumhnak cu an ngei kho rih lo. Cucaah Baibal nih bawhte tipil innak kha a cohlang lo. Mah kha a hmasa Khrihfa hna kong in hngalh khawh a si. Bawhte pawl si loin Pathian Bia a zummi “nu he, pa he” tipil an ing.—Lamkaltu 2:41; 8:12.

A hmaan lomi ruahnak: Evi nih thlauhmi thingthei kha a ei hmasa ruangah Pathian nih nu pawl kha chiat a serh hna.

A hmaanmi: Nu pawl chiatserh canah Pathian nih Evi kha sualnak tuah dingin a hlengtu “rulpi tar, Khuachia, asiloah, Satan” kha chiat a serh. (Biathlam 12:9; Genesis 3:14) Mah lengah sualnak hrampi caah rian a ngeimi cu a nupi kha si loin Adam a si tiah Pathian nih a hmuh.—Rom 5:12.

Adam nih a nupi kha a uk lai tiah Pathian nih zeicah a ti? (Genesis 3:16) Cutin a ti ruangah Pathian nih mah tuahsernak kha a ngaihthiam tinak a si lo. Sualnak ruangah a chuakmi thil ṭhalo kha a chimchungmi a si. Pa nih an nupile kha daw hna sehlaw hmaizah hna seh, cun nu pawl kha upatnak in pehtlaih hna seh tiah Pathian nih aa ruahchan.—Efesa 5:25; 1 Peter 3:7.

A hmaan lomi ruahnak: Nupa umṭinak cu sualnak hrampi a si.

A hmaanmi: Nupa umṭinak cu sualnak hrampi a si lo ti kha mah a ruang hna nih an langhter:

• Pathian nih Adam kha a ṭha le a ṭhalo hngalhnak pe khotu thingkung a tlai ei lo dingin nawl a pek lioah Adam cu amah lawng a rak si, a nupi a um rih lo.—Genesis 2:17, 18.

• Pathian nih Adam le Evi kha “tefa tampi in ngei u,” tiah nawl a pek hna. (Genesis 1:28) Pathian nih a fialmi hna an tuah ruangah dantat an si ahcun Pathian cu a puarhrang tukmi a si lai.

• Adam le Evi nih sualnak kha hmunkhat ah an tuahṭi lo—Evi nih sualnak a tuah hnuah a vapa nih a tuah ve.—Genesis 3:6.

• Nuva nih nupa sinak an hmanmi kha Baibal nih a cohlan.—Phungthlukbia 5:18, 19; 1 Korin 7:3.