Sualnak timi cu Pathian phunglam he aa ralkahmi tuahsernak, intuarnak le ruahnak hna kha an si. Pathian mithmuh ah a hmaan lomi le a ding lomi thil tuahnak thawngin Pathian nawlbia buar zong aa tel. (1 Johan 3:4; 5:​17) A hmaanmi thil kha hngalh ko nain hramhram in buarmi sualnak kong zong Baibal nih a chim.​—Jeim 4:​17.

 A hrampi Baibal ah sualnak tiah lehmi biafang cu “hmuichon khen lo” timi sullam a ngei. Tahchunhnak ah, hlanlio Israel ralkap phukhat cu lungherh cheh a thiam tukmi an si caah an hmuichon kha ‘nganh loin’ an khen khawh. Mah kha a biafang ningin kan leh ahcun “sualnak tuah lo” timi sullam a ngei. (Biaceihtu 20:16) Cucaah sualnak timi cu a tlingmi Pathian phunglam in pial kha a si.

 Pathian cu Sertu a si caah minung caah phunglam sernak nawl a ngei. (Biathlam 4:​11) Kan tuahsernak he aa tlaiin Pathian hmaiah biaceih kan si lai.​—Rom 14:12.

Sualnak pakhat hmanh tuah lo timi cu a si kho maw?

 A si kho lo. Baibal nih “mi vialte cu kan sual dih cio ko i Pathian sunparnak kha kan bau dih cio ko” tiah a ti. (Rom 3:​23; 1 Siangpahrang 8:​46; Phungchimtu 7:​20; 1 Johan 1:8) Zeicah cutin a si?

 Hmasa bik minung, Adam le Evi cu a hramthawk ah sualnak a ngei lomi an si. Mah cu Pathian muikeng in, mitling in ser an si caah a si. (Genesis 1:​27) Asinain Pathian nawl an ngaih lo caah a tlingmi sinak kha an rak sung. (Genesis 3:​5, 6, 17-​19) Fa an hun ngeih tikah an fale kha sualnak le tlinlonak ro an vuih hna. (Rom 5:​12) Israel Siangpahrang David nih “Ka chuahka in miṭhalo ka si” tiah a ti.​—Salm 51:5.

Sualnak cheukhat cu a dang nakin a ngan deuh maw?

 A ngan deuh. Tahchunhnak ah, hlanlio Sodom khua mi hna cu “miṭhalo,” “ṭhatlonak a tuahmi misual” an si caah “an sualnak cu a ngan ngaingai.” (Genesis 13:13; 18:20) Sualnak ngan tiah ti khawhmi a kong pathum kha zohhmanh u sih.

1.   A fakmi. Nupa sualnak, siasal biaknak, firnak, zuritnak, mi thil chuhnak, lainawnnak le khuachia thiamnak ti bantuk sualnak ngan kha hrial awkah Baibal nih ralrin a kan pek. (1 Korin 6:​9-​11; Biathlam 21:8) Baibal nih mah sualnak hna kha ruatset loin le tinhnak ngei loin chimmi, tuahmi ruangah midang fahnak a pemi sualnak he aa dang in a langhter. (Phungthlukbia 12:18; Efesa 4:​31, 32) Asinain zei bantuk sualnak hmanh kha zei rel loin um lo awkah Baibal nih a kan forh, zeicatiah mah nih Pathian nawlbia a kan buarter khawh caah a si.​—Matthai 5:​27, 28.

2.   Lungput. Sualnak cheukhat cu Pathian duhnak hngalh lo ruangah tuahmi a si. (Lamkaltu 17:30; 1 Timote 1:​13) Cu bantuk sualnak le Pathian nawlbia hngalh ko buin hramhram in buarmi sualnak kha Baibal nih aa dang in a langhter. (Nambar 15:30, 31) Hramhram in buarmi sualnak cu a ‘ṭhalomi’ lungput in a rami a si.​—Jeremiah 16:12.

3.   A voi. Baibal nih voikhat lawng tuahmi sualnak le atu le atu tuahmi sualnak aa dannak zong kha a langhter. (1 Johan 3:​4-8) A hmaanmi thil tuah ding ti hngalh hnu hmanhah ‘sualnak a tuah pengmi’ cu Pathian nih bia a ceih hna lai.​—Hebru 10:26, 27.

 Sualnak ngan a tuahmi cu a sualnak ruangah lung sivang in a um men lai. Tahchunhnak ah, Siangpahrang David nih hitin a ṭial: “Ka sualnak tilet chungah ka pil i ka sualnak cu an rih caah tang ah an ka hnuh.” (Salm 38:4) Asinain Baibal nih mah ruahchannak hi a kan pek: “Miṭhalo nih an zulhmi an lam kha hlaw hna seh law an ruahning kha thleng hna seh. BAWIPA kan Pathian leiah cun i mer hna seh, amah cu mi zaangfah a thiam i khulrang in mi a ngaithiam khotu a si.”​—Isaiah 55:7.