Baibal ah “Sui Nawlbia” timi biafang cu a um lo. Asinain mi tampi nih mah biafang kha Jesuh cawnpiakmi nawlbia caah an hman. A min a thang tukmi Tlang Cung Cawnpiaknak ah Jesuh nih hitin a ti: “Mi nih kan cungah tuah hna seh ti nan duh bantuk khan midang cung zongah va tuah ve u.” (Matthai 7:12; Luka 6:31) Sui Nawlbia kha hiti zongin langhter a si: “Na cungah tuah hna seh ti na duh bangin midang cung zongah va tuah ve.”—Encyclopedia of Philosophy.

•  Sui Nawlbia timi a sullam cu zeidah a si?

•  Sui Nawlbia cu zeicah a ṭhat?

•  Sui Nawlbia cu peknak le hmuhnak kong sawhsawh a si maw?

•  Sui Nawlbia kha zeitindah na zulh khawh?

 Sui Nawlbia nih midang kha rak kan pehtlai hna seh ti kan duhmi ningin pehtlaih ve hna awkah a kan forh. Tahchunhnak ah, mi tampi nih upatnak, nemnak le dawtnak in midang nih an pehtlaih hna tikah an sunsak tuk. Kannih zong midang cungah cutin kan tuah ve awk a si.—Luka 6:31.

 Sui Nawlbia kha thil sining tampi ah hman khawh a si. Tahchunhnak ah, mah nih . . .

•   Chungkhar a fehter khawh.—Efesa 5:28, 33.

•   Fale zohkhenhnak ah nulepa kha a bawmh khawh hna.—Efesa 6:4.

•   Hawikom, innpa le rianṭuanṭi hawi he pehtlaihnak ṭha a kan ngeihter khawh.—Phungthlukbia 3:27, 28; Kolose 3:13.

 Sui Nawlbia cu Biakam Hlun ah tampi kan hmuhmi phunglam he an i khat. Jesuh nih a chimmi mah nawlbia cu “[Baibal a hramthawk uknga] Nawlbia le Profet bia [profet cauk] hna i a sullam a si.” (Matthai 7:12) Phungdang in cun, Sui Nawlbia cu Biakam Hlun i a hrampi biatak a simi, innpa daw u timi ah khan an i fun dih.—Rom 13:8-10.

 A si lo. Sui Nawlbia nih peknak kong kha a hleiin a langhter. Jesuh nih Sui Nawlbia kong a chim tikah zaran mi sawhsawh pehtlaih ning lawng kha si loin kan ral pawl pehtlaih ning zong aa tel. (Luka 6:27-31, 35) Cucaah Sui Nawlbia nih mi vialte cungah ṭhatnak tuah awkah a kan forh.

1.  1. Midang duhning kha hmuhthiam i zuam. Na pawngkam mi kha ṭha tein zoh hna. Tahchunhnak ah, mi pakhat nih a ritmi eidin thiltom a cawimi kha na hmuh men lai, na innpa siizung a phan ti kha na theih men lai asiloah na rianṭuanṭi hawi a lung a donghmi kha na hmuh men lai. ‘Midang duhning kha hmuhthiam naa zuam’ tikah an caah bawmtu a si hngami bia chim awk asiloah tuah awkah caanṭha na hmuh ko lai.—Filipi 2:4.

2.  2. Zawnruahnak ngei. Midang zaka ah i umter chunh. An tonmi thil sining khi hei tong law zeitindah na um lai? (Rom 12:15) Midang intuarnak kha hngalhthiam naa zuam tikah mah nih anmah bawmh awkah ann forh lai.

3.  3. A tlarimi si. Mi vialte cu kan i dang ti kha i cinken. Midang nih kan caah tuah hna seh ti an duhmi le nangmah nih ka caah tuah hna seh ti na duhmi cu aa khat men lai lo. Cucaah na tuah khawhmi thil tampi lakah an duh hnga dingmi kha tuah i zuam.—1 Korin 10:24.