A si lo. Baibal nih tangka cu a ṭhalo tiah a ti lo i ṭhatlonak vialte a chuahtertu a si ti zongin a ti lo. “Tangka . . . hi ṭhatlonak phun kip chuahnak hram a si” timi bia cu a tling loin an cherhchanmi a si i mah nih Baibal cungah a hmaan lomi hmuhnak a ngeihter hna. A tak ti ahcun Baibal nih “tangka duhnak hi ṭhatlonak phun kip chuahnak hram a si” tiah a ti. a—1 Timote 6:10.

•  Baibal nih tangka kong he aa tlaiin zeidah a chim?

•  Zeicah Baibal nih tangka duhnak he aa tlaiin ralrin a kan pek?

•  Tangka he aa tlaimi Baibal ruahnak cheuhnak in zeitindah ṭhatnak kan hmuh khawh?

•  Tangka kong he aa tlaimi Baibal caang hna

Baibal nih tangka cu fimkhur tein kan hman tikah man a ngei tuk i ‘huhphenhnak’ hmanh a kan pek khawh tiah a ti. (Phungchimtu 7:12, NW) Baibal nih midang cungah siannak a langhtermi hna kha a thangṭhat hna. Mah ah tangka lei bawmhnak zong aa tel.—Phungthlukbia 11:25

Baibal nih kan nunnak ah tangka kha a biapi bik ah chiah lo dingin ralrin a kan pek. Hitin a ti: “Tangka hi duh tuk hlah u, nan ngeihmi ah khan nan lung awi ko u.” (Hebru 13:5) Kan cawn khawhmi cu tangka kha aa tlak ningin hman le rum awkah i zuam lo ding kha a si. Mah canah tirawl, thilpuan le umnak inn ti bantuk kan herh taktakmi thil hna in i lungsi awkah kan i zuam ding a si.—1 Timote 6:8.

A hak a kaumi nih cun zungzal nunnak an hmu lai lo. (Efesa 5:5) Zeicatiah hakkauhnak cu siasal biaknak asiloah a hmaan lomi biaknak phunkhat a si caah a si. (Kolose 3:5) Cun a hak a kaumi nih an duhmi thil hmuh khawh awkah a ṭhami phunglam hna kha an hlawt tawn. Phungthlukbia 28:20 nih “khulrang in rum aa zuammi cu dantatnak hmu loin a um lai lo” tiah a ti. Mah nih tlerhkhonhnak, hramhram in tangka chuhnak, hlennak, minung firnak le thahnak ti bantuk zaang-ennak hna hmanh a tuahter khawh hna.

Tangka duhnak nih a ṭhalomi ziaza a kan ngeihter lo hmanhah a dang thil ṭhalo tampi a chuahter khawh. Baibal nih “rum a duhmi hna cu tukforhnak chungah khan an tla i ṭih a nungmi le ṭhatlonak a chuahter khotu duhnak nih khan rap foih in a foih hna” tiah a ti.—1 Timote 6:9.

Tangka ruangah ziazalei phunglam le thlaraulei thil hna kha kan thlahdorh lo ahcun Pathian mithmai ṭha le bawmhnak kan hmuh lengah mahle mah upatnak zong kan ngei lai. Pathian nih a lung lawmhter awkah lungthin tak tein aa zuammi kha hitin bia a kamh hna: “Kaan kaltak bal hna lai lo i kaan hlaw bal fawn hna lai lo.” (Hebru 13:5, 6) Cun “zumh awk tlakmi cu thluachuahnak tampi a hmu lai” ti zongin bia a kan kamh.—Phungthlukbia 28:20.