Mawngcik i chunhnak kong kha Baibal ah voikhat lawng a langhter, Levitikas 19:28 ah hitin a ti: “Nan pum cungah a ṭial zong i ṭial fawn hlah u.” Mah nawlbia cu Pathian nih Israel mi a pekmi hna a si. A ruang cu khuachia pathian hna i an min le an hmelchunh hna kha an taksa cungah aa ṭialmi, an pawngkam mi hna he an i thleidan nakhnga caah a si. (Deuteronomi 14:2) Khrihfa a simi nih Israel mi pek an simi mah nawlbia kha zulh awkah rian kan ngei lo nain mah nawlbia hnulei i a ummi phunglam tu cu thukpi in ruah a hau.

Khrihfa nih mawngcik i chunh a ngah maw?

 A tanglei i Baibal caang hna nih mah kong he aa tlaiin ṭha tein tuaktan khawh awkah aan bawmh lai:

•   “Nu zong a za tawk le aa dawh tawk in i thuam hna seh.” (1 Timote 2:9) Mah phunglam cu nu he, pa he aa pehtlaimi a si. Midang hmuhning kha kan upat awk a si. Mi nih lungthin a kan pek nakhnga a hleihluat tuk in kan i ṭamh awk a si lo.

•   Mi cheukhat nih zei bantuk mi dah kan si ti le zalonnak tling tein kan ngei ti langhter an duh caah mawngcik an i chun, cheukhat tu nih cun kan pum cu kan duh ning paohin kan tuah khawh ti langhter an duh caah an i chun. Asinain Baibal nih Khrihfa pawl kha hitin a forh hna: “Pathian sinah a nung in pekchanhmi raithawinak bantukin i pe tuah u; a rian ah aa pumpemi le cohlan awk tlakmi si tuah u; cucu biaknak taktak Pathian nan pek awk biaknak cu a si.” (Rom 12:1) Khuaruah khawhnak na ngeihmi kha hmangin mawngcik i chunh na duhnak a ruang kha i dothlat. Chan tiluan dawi awk asiloah phu pakhat chungtel na si langhter awkah chunh na duh ahcun a hnu i na lungput aa thlen tikah mawngcik naa chunhmi cu hrawh ṭhan khawh a si ti lai lo ti kha i cinken. Mawngcik i chunh na duhnak a ruang na dothlatmi nih biakhiahnak ṭha tuah khawh awkah aan bawmh lai.—Phungthlukbia 4:7.

•   “Namchan in thil a timi paoh cu sifahnak an tong hrimhrim ve ko lai.” (Phungthlukbia 21:5) Mi nih mawngcik i chunh awkah khulrang in biakhiahnak an tuah tawn. Asinain a hnuah mah nih zatlang nunnak ah le rian ah caan saupi chung a hnorsuan khawh. Mah lengah mawngcik naa chunhmi kha hrawh ṭhan na duh ahcun tangka tampi na dih lai lengah pum fahnak zong na in lai. Hlathlainak an tuahmi le mawngcik hrawhpiaknak rian hna a karh chinmi nih mawngcik aa chunmi tampi cu hrawh ṭhan an duh ti kha a langhter.