Teirul cham khawh a si tiah kan ruah hmanhah cutin tuahnak cu Baibal ruahnak cheuhnak he aa ralkah. “‘Ka cungah a tuah bantukin ka tuah ve lai, a tuahmi kha ka lehrulh ve lai,’ ti hlah.” (Phungthlukbia 24:29) Baibal ah teirul cham duhnak lungput tei khawh awkah a bawmmi ruahnak cheuhnak tampi aa tel.

Hi capar ah

•  Teirul cham i zuam cu zeidah a palh?

•  Pathian nih zeitindah dan a tat hna lai?

•  Teirul cham duhnak lungput kha zeitindah ka tei khawh?

•  Teirul chamnak he aa tlaiin a hmaan lomi ruahnak

 Mi pakhat nih na thin aan hunter asiloah harnak aan pek tikah na thin a hunmi le a tuahsernak ruangah dantat si seh ti na duhmi cu a phung a si ko. Asinain pumpak in teirul chamnak cu Baibal phunglam he aa ralkah. Zeicah?

 Mi nih anmah tein teirul cham an i zuammi kha Pathian nih a duh lo. Baibal ah Jehovah a Pathian nih hitin a ti: “Phuhlam cu keimah rian a si, keimah nih ka lehrulh hna lai.” (Rom 12:19) Baibal nih teirul cham canah daihnak he thil sining thawnghtham awkah tha a kan pek. (Rom 12:18) Asinain daihnak ser awkah a si khawh chungin aa zuam ko nain a hlawh a tlin lo ah tah zeitin? Jehovah nih dinlonak vialte a hrawh dih cang lai ti kha zumh awkah Baibal nih a kan cawnpiak.—Salm 42:10, 11.

 Atu ah Pathian nih minung uktu hna kha mi pawl dantatnak nawl a pek hna. (Rom 13:1-4) A caan a cut tikah a puarhrangmi, misual vialte kha Pathian nih bia a ceih hna lai i sifah harnak hi a hrawh dih cang lai.—Isaiah 11:4.

•   Thinhun lioah thil tuah kha hrial. (Phungthlukbia 17:27) Mi nih an thinhun lioah an tuah sualmi le an chim sualmi ruangah a hnuah an i ngaichih ṭhan tawn. Lehrulh hlanah a caan pek in khua a ruatmi hna nih a ṭhami biakhiahnak an tuah khawh.—Phungthlukbia 29:11.

•   A kong a dikthliar hngalh i zuam. (Phungthlukbia 18:13) Kan cungah palhnak an tuah hmanhah hitin kan i hal awk a si: ‘Hitin a tuahnak a ruang he aa tlaiin ka hngalh lomi a um maw? A lung a buai tuk caah maw a si? Asiloah i hngalh loin a tuahmi dah a si?’ A caan ah hramhram in tuahmi a lo nain ruahlopi in tuah sualmi zong a si kho.

 A hmaan lomi ruahnak: Baibal nih mah tein teirul chamnak kha nawl a awnh lo caah doh kan si tikah kan i runveng lai lo.

 A hmaanmi: Doh kan si tikah mahle mah i runvennak nawl kan ngei. Nawlngeitu hna sinah bawmhnak hal khawh a si. Asinain a si khawh tik paohah a puarhrangmi lam in lehrulh kha kan hrial awk a si tiah Baibal nih a ti.—Phungthlukbia 17:14.