Aan bawmh khawh! Baibal cu “lung a dongmi lung ṭhawnnak a pe tawntu Pathian” sinin a rami a si. (2 Korin 7:6) Baibal cu lungthinlei ngandamnak cauk a si lo nain mahle mah i thah duhnak lungput kha tei awkah aan bawmh khawh. Mah ah aa telmi zulh awk tlak ruahnak cheuhnak hna nih aan bawmh khawh.

•  Baibal ah zulh awk a tlakmi zei ruahnak cheuhnak dah a um?

•  Baibal nih thih a duhmi hna kong kha a langhter maw?

•  Zei Baibal caang nih dah mahle mah i thah duhnak kha tei awkah aan bawmh?

•  Kan hawi pakhat nih “thih ka duh” tiah a ti ah tah zeitin?

•  Mahle mah i thah dingin aa tim balmi ka si ah tah zeitin?

• ● Na intuarnak kha phuang.

   Baibal chimmi: “Hawikom nih cun zei tik paohah dawt zungzal a si, u le nau cu harnak i hrawm awkah hrin kan si.”—Phungthlukbia 17:17.

   A sullam: Lungthinlei in fahnak kan tuar tikah midang sinin bawmhnak kan herh.

   Kan intuarnak kha kan phuan lo ahcun inkhawh ti lo tiangin kan caah thilrit a hung si kho. Asinain na intuarnak kha na phuan ahcun na inmi fahnak a zor deuh lai i hrimhnak na hmu lai.

   Mah hi tuahchunh: Na chungkharmi asiloah na zumhmi na hawi pakhatkhat sinah tuni ah phuang colh. a Na intuarnak kong kha ca in ṭialnak thawng zongin cutin na tuah khawh.

• ● Siilei in bawmhnak hal hna.

   Baibal chimmi: “A dammi nih cun siibawi an herh lo, a zawmi lawng nih khan an herh.”—Matthai 9:12.

   A sullam: Kan zawt tikah sii thlop kan hau.

   Mahle mah i thah duhnak lungput cu lungthinlei zawtnak hmelchunh a si. Pumsalei zawtnak bantuk a si caah ningzah awk a si lo. Lungthinlei zawtnak cu thlop khawh a si ko.

   Mah hi tuahchunh: A thiammi siibawi sinah a rannak in bawmhnak hal.

• ● Pathian nih aan zohkhenh ti kha philh hlah.

   Baibal chimmi: “Pithlung panga cu pia hnih ah an zuar hna a si lo maw? Asinain an lak i pakhat hmanh khi Pathian nih a philhmi hna an um lo. Nan lu cung samfa hmanh kha a rel dih hna. Cucaah nan thinphang hlah u: pithlung tampi nakin pei nan sun deuh cu!”—Luka 12:6, 7.

   A sullam: Pathian caah na sunglawi tuk.

   Na li a leng ko lai nain Pathian nih na tonmi thil kha a hmuh dih. Nun duhnak lungthin na ngeih ti lo hmanhah aan dawt. Salm 51:17 (NW) ah “a kekkuaimi lungthin hi na hlaw lai lo” tiah a ti. Pathian nih aan dawt caah nunter aan duh rih.

   Mah hi tuahchunh: Pathian nih aan dawt ti a langhtermi kong kha Baibal ah kawl. Tahchunhnak ah, Jehovah kha Naih timi cauk, ṭhen 24 [Kawl] kha zoh.

• ● Pathian sinah thla cam.

   Baibal chimmi: “Amah nih aan zohkhenh hna caah nan lungretheihnak vialte kha amah cungah chia dih ko u.”—1 Peter 5:7.

   A sullam: Pathian nih na intuarnak le na lungretheihnak vialte kha a sinah phuang seh ti aan duh.

   Pathian nih lungdaihnak le inkhawhnak ngeih awkah thazaang aan pek khawh. (Filipi 4:6, 7, 13) Cuticun lungtak tein amah a kawlmi hna kha a bawmh hna.—Salm 55:22.

   Mah hi tuahchunh: Tuni hrimhrim ah Pathian sinah thlacam. A min Jehovah kha hmang law na intuarnak vialte kha chim. (Salm 83:18) Inkhawhnak ngeih peng awkah bawmhnak hal.

• ● Hmailei he aa tlaimi Baibal ruahchannak kong kha ruat.

   Baibal chimmi: “Hi ruahchannak hi kan nunnak caah a fekmi le a ṭhawngmi thir cangai bantuk a si.”—Hebru 6:19.

   A sullam: Na intuarnak cu thlichia nih khatlei, khatlei ah a choihmi tilawng bantuk a si kho, asinain Baibal ruahchannak nih lungdai tein um awkah aan bawmh khawh.

   Mah ruahchannak cu saduhthah men a si lo, fahnak kan inmi vialte kaan hlohpiak hna lai timi Pathian biakam cungah aa hngatmi a si.—Biathlam 21:4.

   Mah hi tuahchunh: Baibal ah aa telmi ruahchannak kong kha tam deuh hngalh awkah Pathian Sinin A Rami Thawngṭha brochure, ṭhen 5nak kha rel.

• ● Aan nuamhtermi thil hna kha tuah.

   Baibal chimmi: “Lungthin lawmh hi siiṭha a si.”—Phungthlukbia 17:22.

   A sullam: A kan lawmhtermi thil kan tuah tikah lungthinlei asiloah ruahnaklei in ṭhatnak kan hmu.

   Mah hi tuahchunh: Nuamhnak aan pe kho hngami thil pakhatkhat kha tuah. Tahchunhnak ah, lungṭhawnnak a pemi music kha ngai, thazaang a pemi ca kha rel asiloah na huammi thil kha tuah. Cun thil hmete a si hmanhah midang na bawmh hna tikah naa nuam deuh ve lai.—Lamkaltu 20:35.

• ● Pumsalei ah ngandam i zuam.

   Baibal chimmi: “Pum cawlcanghnak nih ṭhatnak tlawmpal a chuahter.”—1 Timote 4:8, NW.

   A sullam: Pum cawlcanghnak kan tuah tik, kan mitku a vuai tik le ngandamnak a pemi rawl kan ei tikah ṭhatnak kan hmu.

   Mah hi tuahchunh: Minit 15 chung tal lam i chawk.

• ● Kan intuarnak le kan sining cu aa thleng kho ti kha i cinken.

   Baibal chimmi: “Thaizing ah na nunnak cu zei a lawh lai hmanh na hngalh ṭung lo.”—Jeim 4:14.

   A sullam: Uk khawh dawh a si lomi lungretheihnak hna hmanh chikkhat lawng an um kho.

   Tuni ah na lung a dong tuk ko lai nain thaizing ah aa thleng kho. Cucaah tawnghtham khawhnak lam kha kawl. (2 Korin 4:8) Lungretheihnak hna cu a caan a cut tikah aa thleng kho. Mahle mah i thahnak cu khirh ṭhan khawh a si ti lo.

   Mah hi tuahchunh: Baibal chung i langhtermi, an lung a dongh tuk caah thih hmanh a duhmi hna kong kha rel. An hngalh chung khawh lomi lam in a ṭhatnaklei in an sining aa thlen ning kha hlathlai. An lak i cheukhat kong hi zohhmanh.

 A langhter. Baibal nih “thih ka duh” tiah a chimmi kong cheukhat kha a langhter. Pathian nih a rak mawhchiat hna lo, bawmhnak tu a rak pek hna. Nangmah cung zongah cutin a tuah khawh ve.

Elijah

•  ● Anih cu ahodah a si? Elijah cu a ral a ṭhami profet pakhat a si. Asinain a lung a rak dong tuk. Jeim 5:17 ah “Elijah kha kanmah bantuk minung a si ve ko” tiah a ti.

•  ● Zeicah thih a duh? Voikhat cu, Elijah nih keimah lawng ka si timi ruahnak, ṭihnak le man ka ngei lo timi lungput a ngei. Cucaah “Maw BAWIPA, ka nunnak kha la ko” tiah a rak ti.—1 Siangpahrang 19:4.

•  ● Zeinihdah a bawmh? Elijah nih a intuarnak vialte kha Pathian sinah a phuan. Pathian nih zeitindah thazaang a pek? Pathian nih a cungah siaherhnak a ngeih le a ṭhawnnak zeitluk in dah a ngan ti kha a hmuhsak. Cun Elijah cu a caah man ngeimi a si kha a zumhter lengah bawmhnak zong a rak pek.

•  ▸ Elijah kong kha rel: 1 Siangpahrang 19:2-18.

Job

•  ● Anih cu ahodah a si? Job cu zumhfek tein Pathian a biami, chungkhar nganpi a ngeimi mirum pakhat a si.

•  ● Zeicah thih a duh? Job nunnak cu ruahlopi in a chiatnaklei ah aa thleng. A ngeihmi thil vialte a sung dih. Leiser ral ruangah a fale an dihlak in an thi. Amah theng fih a nungmi zawtnak nih a tlunh. A donghnak ah a tonmi harnak he aa tlaiin a hmaan loin sualphawt a si. Job nih hitin a ti: “Ka hnabei a dong, nun hi ka duh ti lo.”—Job 7:16.

•  ● Zeinihdah a bawmh? Job cu Pathian sinah thla a cam i midang kha bia a ruah hna. (Job 10:1-3) Zaangfahnak a ngeimi a hawi, Elihu nih thazaang a pek i a sining kha lamdang in hmuh awkah a bawmh. Mah lengah Job nih Pathian sinin a rami ruahnak cheuhnak le bawmhnak kha cohlang.

•  ▸ Job kong kha rel: Job 1:1-3, 13-​22; 2:7; 3:1-13; 36:1-7; 38:1-3; 42:1, 2, 10-13.

Moses

•  ● Anih cu ahodah a si? Moses cu hlanlio Israel mi hruaitu le zumhfekmi profet a si.

•  ● Zeicah thih a duh? Moses cu ṭuan ding rian tampi a ngeih lengah atu le atu an zaihnawh caah a lung a dong. Cucaah “hmakhatte ah ka that ko” tiah Pathian kha a rak nawl.—Nambar 11:11, 15.

•  ● Zeinihdah a bawmh? Moses nih a intuar ning kha Pathian a chimh. Pathian nih a retheihnak zanter awkah a rian kha a tlawmter deuh.

•  ▸ Moses kong kha rel: Nambar 11:4-6, 10-17.