Baibal ah thlaraulei lungput ngeih timi biafang cu Pathian lunglawmhter duhnak le Pathian ruah ningin ruahnak timi sullam a ngei. Thlaraulei lungput a ngeimi pakhat nih cun Pathian phunglam ningin nun awkah thiang thlarau lamhruainak ningin nun aa zuam lai. a—Rom 8:5; Efesa 5:1.

 Baibal nih thlaraulei lungput a ngeimi le a ngei lomi hna i an i dannak kong kha a langhter tawn. Tahchunhnak ah thlaraulei lungput a ngeimi nih cun thiang thlarau lamhruainak kha a zulh i “thlarau a ngei lomi nih cun Pathian thlarau sinin a rami laksawng cu an hmu kho lo” asiloah Pathian cawnpiaknak kha an cohlang lo. (1 Korin 2:14-16) Thlaraulei lungput a ngeimi nih cun zaangfahnak a ngei i rem tein um a duh, asinain vawlei nunning in a nungmi hna cu nahchunhnak le ‘pakhat le pakhat i sik duhnak lungput’ an ngei. (1 Korin 3:1-3) Thangchiatnak biachim a hmang i hawikom a ṭhencheu tertu hna cu “an pumsa duhnak nih a ukmi, thlarau a ngei lomi an si.”—Judas 19; Phungthlukbia 16:28. b

Hi capar ah

•  Thlaraulei lungput cu khoika indah a rat?

•  Thlaraulei lungput ngeih cu zeicah a biapit?

•  Thlaraulei lungput zeitindah kan ngeih khawh?

•  Thlaraulei lungput ngeih awkah biaknak ngeih a hau maw?

•  Thlaraulei lungput ngeihnak kong he aa tlaiin a hmaan lomi ruahnak hna

•  Thlaraulei lungput ngeihnak kong a langhtermi Baibal caang hna

 Pathian mui keng in ser kan si caah thlaraulei lungput kan ngei kho. (Genesis 1:27) Cucaah mi tampi nih an tawngh khawh lomi le an hmuh khawh lomi kong hngalh an duh i an sunsakmi cu khuaruahhar awk a si lo.

 Rem tein um, zaangfahnak ngeih le duhdanhnak ngeih lo ti bantuk Jehovah c Pathian sining hna kha kan ngei ve. (Jeim 3:17) Pathian nih a nawl a ngaimi hna kha a thiang thlarau a pek hna.—Lamkaltu 5:32.

 Thlaraulei lungput ngeihnak nih “nunnak le daihnak” a chuahter. (Rom 8:6) Mah cu Pathian sinin kan hmuhmi a sunglawi tukmi laksawng a si.

•   Nunnak: Thlaraulei lungput a ngeimi hna cu zungzal nunnak ka pek hna lai tiah Pathian nih bia aa kam.—Johan 17:3; Galati 6:8.

•   Daihnak: Pathian he dai te le rem tein um kha a chim duhmi a si. An pumsa duhnak biapi ah a chiami hna cu Pathian ral an si. (Rom 8:7) Thlaraulei lungput ngeih awkah aa zuammi hna cu “Pathian daihnak, minung hngalhnak a lonhtu” kha an hmuh lai. (Filipi 4:6, 7) Cu bantuk daihnak a hmumi hna i an nunnak cu a nuam tuk.—Matthai 5:3.

•   Pathian nawlbia kha cawng law zul. Baibal kha rel law hlathlai. Zeicahtiah Pathian ruahnak kong kha ‘thiang thlarau nih a fialmi’ hna nih Baibal ah an ṭial caah a si. (2 Peter 1:21) Na hngalhmi nih “thlarau le biatak” in biak awk le thlarau lamhruainak zulh in mah ningin nun awkah an bawmh lai.—Johan 4:24.

•   Pathian bawmhnak hmuh awkah thlacam. (Luka 11:13) Thlaraulei lungput ka ngei ti aan hngalhtermi sining hna ngeih awkah Pathian nih aan bawmh lai. (Galati 5:22, 23) Na tonmi zuamcawhnak tawnghtham awkah fimnak zong an pek khawh.—Jeim 1:5.

•   Thlaraulei lungput a ngeimi hna he i kom. Annih nih thlaraulei lungput ngeih peng awkah an in bawmh lai. (Rom 1:11, 12) Pathian ruahnak a ralchanhmi hna he naa komh ahcun Pathian he nan i pehtlaihnak a rawk kho.—Jeim 4:4.

 Biaknak ngeihnak men in thlaraulei lungput a ngeimi kan si kho lo. Baibal nih hitin a ti: “Mi pakhatkhat nih kei cu biaknaklei ah aa zuammi ka si tiah aa ruat ko lai, sihmanhsehlaw a lei kha a uk khawh lo ahcun a biaknak cu pakpalawng a si i amah le amah aa hlengmi a si.”—Jeim 1:26.

 Asinain thlaraulei lungput a ngeimi hna nih Pathian nih a duhmi lam in an biak tiah Baibal nih a ti. Annih nih Pathian thiang thlarau cu “pakhat” lawng a um ti kha an cohlan. Cun “pum cu pakhat lawng a um” phundang in cun ‘thlarau nih an pekmi hna daihnak hri kha fek tein ṭem’ awkah aa zuammi bu pakhat in biak awkah mah thlarau nih a forh hna.”—Efesa 4:1-4.

 A hmaan lomi ruahnak: Nunnak a ngeimi vialte cu thlaraulei lungput an ngei.

 A hmaanmi: Sermi thil vialte nih Pathian kha an thangṭhat. (Salm 145:10; Rom 1:20) Asinain hngalhnak a ngeimi thilnung lawng nih thlaraulei lungput an ngei kho. Mah he i ralkah in saram hna nih cun anmah thil hngalh khawh ning le kokek an duh ningin an tuah caah Pathian he an i naih kho lo. (2 Peter 2:12) Cucaah Baibal nih thlaraulei lungput a ngei lomi hna cu saram lungput a ngeimi le pumsa duhnak ningin a nungmi hna an si tiah a ti.—Jeim 3:15; Judas 19.