Pathian nih zumhfekmi Khrihfa hna lakin mi cheukhat kha milu rikhiah in a thim hna, annih cu an thih hnuah van ah an tho ṭhan lai. (1 Peter 1:​3, 4) Thim a simi hna nih zumhfek tein um peng le an tuahsernak kip ah thiang tein um peng a hau. Cutin a si lo ahcun vancung an ro kha hmuh awkah sining an tlinh kho lai lo.​—Efesa 5:5; Filipi 3:​12-14.

Vancung ah zeidah an tuah lai?

 Jesuh he kum 1,000 chung siangpahrang le tlangbawi rian an ṭuan lai. (Biathlam 5:​9, 10; 20:6) Annih nih “vawlei thar,” asiloah vawlei lei a uk dingmi “van thar,” asiloah vancung cozah kha an dirh lai. Mah lengah Pathian i a hramthawk aa tinhnak ningin mi vialte kha dinnak hmuh ṭhan awkah an bawmh hna lai.​—Isaiah 65:17; 2 Peter 3:13.

Vancung ah a tho ṭhan dingmi cu pa zeizat dah an si?

 Baibal nih vancung ah a tho ṭhan dingmi cu 144,000 an si tiah a ti. (Biathlam 7:4) Biathlam 14:​1-3 ah ṭialmi langhnak ah lamkaltu Johan nih “Zion Tlang i Tuufa a dir komi kha ka hmuh; a sinah cun mi 144,000 an um” tiah a ti. Langhnak chung i “Tuufa” timi cu a tho ṭhanmi Jesuh kha a si. (Johan 1:​29; 1 Peter 1:​19) “Zion Tlang” timi cu Jesuh he vancung ah uktu a ṭuanṭi dingmi 144,000 le Jesuh i a dirhmun kha a si.​—Salm 2:6; Hebru 12:22.

 Pathian Pennak ah Khrih he ukṭi dingin ‘a kawh hna i a thimmi hna’ cu “tuurun hmete” kha an si. (Biathlam 17:14; Luka 12:32) Cucaah Jesuh i a tuu dihlak he tahchunh ahcun annih cu mi tlawmte an si lai ti a fiang.​—Johan 10:16.

Vancung a kai dingmi hna he aa tlaiin a hmaan lomi ruahnak

 A hmaan lomi ruahnak: Biathlam chung i 144,000 cu langhternak nambar men a si, a ca ningin lak khawh a si lo.

 A hmaanmi: Biathlam cauk ah nambar hna kha langhternak in a hman ko nain nambar cheukhat tu cu a biafang ningin a hman. Tahchunhnak ah, “Tuufa lamkaltu pahleihnih hna min” tiah a langhter. (Biathlam 21:14) Cu bantukin 144,000 zong a ca ningin lak khawh a si tiah biachahnak tuah awkah a ruang ṭha hna a um.

 Biathlam 7:4 ah “hmelchunhnak an khenhmi [asiloah, vancung nunnak hmu dingin thimmi] hna cu 144,000 an si” tiah a langhter. Mah Baibal caang a cungtang bia ah a pahnihnak phu cu “mibu nganpi, ahohmanh nih a rel in an rel cawk lomi” tiah i thleidang ngaiin a langhter. Mah “mibu nganpi” zong Pathian sinin khamhnak a hmumi an si. (Biathlam 7:​9, 10) 144,000 cu langhternak nambar a si i a ca ningin lak khawh lomi a si ahcun mah phu pahnih he aa tlaiin i thleidang ngaiin a langhtermi cu sullam a ngei lai lo. a

 Mah lengah 144,000 cu ‘minung hna lakin tlanhmi, pekchanh hmasa bikmi’ an si tiah a ti. (Biathlam 14:4) “Pekchanh hmasa bikmi” timi biafang nih mi tlawmpal lawng a simi aiawhtu pawl kha a chim duhmi a si. A rel in rel cawk lomi vawleicung rammi pawl kha vancung in Khrih he a ukṭi dingmi hna he aa tlaiin cutin a langhtermi cu aa tlak tukmi a si.​—Biathlam 5:​10.