Mikhael kha biaknak cheukhat nih “A Thiangmi Mikhael” tiah an auh. Mah min cu Jesuh vawleicung a rat hlan le vancung a kir ṭhan hnu i a min a si. a Moses ruak kong he aa tlaiin Mikhael cu Satan he an i al. Profet Daniel sinah Pathian bia a phuangtu vancungmi kha Mikhael nih a rak bawmh. (Daniel 10:13, 21; Judas 9) Mikhael timi min sullam cu​—“Ahodah Pathian He Aa Lo?” timi a si. Mah min ningin Mikhael cu Pathian uknaklei ah a ṭang i ral pawl kha a doh hna.​—Daniel 12:1; Biathlam 12:7.

 Jesuh cu vancungmi bawi bik Mikhael a si tiah chim khawh a sinak a ruang kha zohhmanh hna u sih.

•   Mikhael cu “vancungmi lak i upa bik” a si. (Judas 9) “Vancungmi bawi bik” ti sullam a ngeimi “vancungmi lak i upa bik” timi upatnak min cu Baibal ah voihnih lawng a langhter. A voihnih ningin pakrelnak (singular) ca lawngah a hman. Cucaah mah upatnak min cu vancungmi pakhat lawng nih a ngeihmi a si ti kha a fiang. Baibal caang pakhat nih a tho ṭhanmi Jesuh he aa tlaiin hitin a ti: “Au thawng, vancungmi bawi bik au thawng, . . . cu a hung thang lai i Bawipa hrimhrim cu vancung khin a rung ṭum lai.” (1 Thesalon 4:​16) Jesuh nih “vancungmi bawi bik au thawng” a chuah khawhmi cu amah hrim hi vancungmi bawi bik Mikhael a si caah a si.

•   Mikhael cu vancung ralkapbu hruaitu a si. “Mikhael le a vancungmi hna nih khan limkeng [Satan] cu an doh.” (Biathlam 12:7) Mikhael cu vancung ah nawl a ngei ngaimi a si caah “vancungmi bawi bik” le “a nganmi vancungmi” tiah auh a si. (Daniel 10:13, 21; 12:1) Mah upatnak min hna ruangah Mikhael cu “vancung ralkapbu hruaitu a hung si” tiah New Testament scholar David E. Aune nih a ti.

   Vancung ralkapbu cungah nawl a ngeimi a dang min pakhat zong kha Baibal nih a langhter. Hitin a ti: “Bawipa Jesuh cu a vancungmi mi ṭhawng hna le meizik he . . . a rung ṭum tikah ding tein a tuah lai.” (2 Thesalon 1:​7, 8; Matthai 16:27) Jesuh cu “vancung ah a kai i Pathian orhlei kam ah a um i vancungmi vialte le vancung nawlngeihnak vialte le ṭhawnnak vialte kha a uk dih hna.” (1 Peter 3:​21, 22) Pathian nih Jesuh he, Mikhael he vancung ralkapbu hruaitu in rian pek cu a si khawh lo caah mah min pahnih cu mi pakhat ngeihmi a si lai tiah kan chim khawh.

•   Mikhael cu a um bal lomi “harnak ṭhalo bik” a tlun caan ah “a hung chuak lai.” (Daniel 12:1) Daniel cauk chungah “a chuak lai” timi biafang kha thil sining a tawngtham dingmi siangpahrang he aa tlaiin a hman tawn. (Daniel 11:​2-4, 21) “Pathian Bia” tiah auhmi Jesuh Khrih nih “siangpahrang vialte Siangpahrang” in Pathian ral vialte kha a hrawh dih hna lai i Pathian miphun kha a huhphenh hna lai. (Biathlam 19:11-​16) ‘Vawlei hramthawk in nihin ni tiangah a ummi harnak a zeihmanh nakin a fak deuhmi harnak’ caan ah Jesuh nih cutin a tuah lai.​—Matthai 24:21, 42.