A si lai lo, Vawlei cu zeitikhmanh ah mei in khangh asiloah hrawh a si lai lo i a dang in airolh zong a si lai lo. Pathian nih vawlei hi zungzal hmun dingin a ser tiah Baibal nih a langhter.

•   “A dingmi cu ram chungah him tein an um lai i ram cu zungzal in anmah ta a si lai.”​—Salm 37:29.

•   “Vawlei cu a umnak hmun ah khan fek tein na bunh i ahohmanh nih an ṭhial kho lo.”​—Salm 104:5.

•   “Vawlei cu a sining ṭhiamṭhiam khan a hmun zungzal ko.”​—Phungchimtu 1:4.

•   “Vawlei kha a ser i a siam, fek te le saupi nguh in a ser, vawlei cu thetse ram, ram pakpalawng ah a ser lo, minung umnak caah a ser.”​—Isaiah 45:18.

 Thli le ti thurhnawmhnak, raldohnak asiloah a dangdang ruangah vawlei rawh dih dingin cun Pathian nih a awnh lai lo. Mah canah ‘vawlei a hrawktu hna kha a hrawh’ hna lai. (Biathlam 11:18) Zeitindah cutin a tuah lai?

 Vawlei a huppheng kho lomi minung cozah kha zei thil paoh a tuah khomi, a tlingmi vancung Pennak in Pathian nih a airolh lai. (Daniel 2:​44; Matthai 6:​9, 10) Mah Pennak i uktu cu Pathian Fapa, Jesuh Khrih a si lai. (Isaiah 9:​6, 7) Vawleicung a um lioah Jesuh nih kokek ṭhawnnak a uk khawh kha a rak langhter. (Marka 4:​35-​41) Pathian Pennak Siangpahrang in Jesuh nih vawlei le kokek ṭhawnnak hna kha a uk lai. Vawlei kha a hramthawk ah a rak ummi, aa dawh tukmi Eden dum bantukin ser ṭhan a si lai.​—Matthai 19:28; Luka 23:43.

 A langhter lo. 2 Peter 3:7 ah a chimmi “atu i a ummi van le vawlei hi mei in hrawh awkah a zuah rih hna” timi bia an hngalhthiam ning a palh caah a si. A sullam hngalhthiam awkah a biapimi mah a kong pahnih hi zohhmanh:

1.   Baibal nih “van,” “vawlei” le “mei” timi biafang hna kha a dang sullam zongin a hman tawn. Tahchunhnak ah, Salm 33:8 ah hitin a ti: “Vawlei vialte, BAWIPA cu ṭih tuah.” Hika ah “vawlei” timi nih minung kha a aiawh.

2.   Kuathnih Peter 3:7 i a cungtang bia nih van, vawlei le mei i a sullam kha a langhter. Caang 5 le 6 ah Noah chan i Buanchukcho kong a langhter. Mah lioah vawlei cu ti in hrawh a si ko nain vawlei taktak cu a rak tlau lo. Mah canah a puarhrangmi minung asiloah “vawlei” tu cu hrawh a rak si. (Genesis 6:​11, Judson Bible) Vawleicung i mi pawl a uk liomi minung cozah “van” zong hrawh a rak si. Miṭhalo lawng hrawh an si, vawlei cu a rawk lo. Buanchukcho in vawlei hrawhnak in Noah le a chungkhar cu an luat i vawleicung ah khua an rak sa rih.​—Genesis 8:​15-​18.

 Hrawhnak caah hmanmi ti bantukin 2 Peter 3:7 ah langhtermi “mei” zong nih vawlei kha si loin miṭhalo pawl kha a hrawh hna lai. Pathian nih “van thar le vawlei thar, dinnak a umnak hmun” kha a kan kamh. (2 Peter 3:​13) “Vawlei thar” tiah auhmi minung bu thar kha “van thar” tiah auhmi Pathian Pennak cozah thar nih a uk lai. Pathian Pennak uknak tangah vawlei cu a himmi paradis a hung si lai.​—Biathlam 21:​1-4.