Mah biahalnak a tuahmi hna cu sunghnak nganpi a tongmi an si caah a phi hngalh le hnemhnak a herhmi an si. Cheukhat nih mi tampi thahnak cu minung ṭhatlonak lakah a sang bikmi a si tiah an hmuh. Cucaah Pathian kha zumh awkah an i harh.

  A hmaan lomi ruahnak: Mi tampi thahnak hi zeicah Pathian nih umnak nawl a awnh ti biahalnak tuah cu a palh.

 A hmaanmi: Zumhfekmi hna zong nih zeicah Pathian nih ṭhatlonak umnak nawl a awnh timi biahalnak kha an rak tuah. Tahchunhnak ah, profet Habakkuk nih Pathian kha hitin a rak hal: “Zeicahdah ṭhatlonak hi vialte hi na ka hmuhter . . . ? Rawhralnak le zaang-ennak nih an ka chuah hnawh.” (Habakkuk 1:3) Mah tikah Pathian nih Habakkuk kha sualphawt canah mah a biahalnak kha mi vialte nih rel khawh awkah Baibal ah a ṭialter.

  A hmaan lomi ruahnak: Minung tonmi sifah harnak hi Pathian nih zei ah a rel lo.

 A hmaanmi: Pathian nih ṭhatlonak le mah ruangah a chuakmi harnak hna kha a huat. (Phungthlukbia 6:16-19) Noah chan ah vawleicung i a karhmi ṭhatlonak ruangah Pathian cu “a ngaih a chia.” (Genesis 6:5, 6) Cucaah Mi Tampi Thahnak he aa tlai zongin Pathian cu a ngaih a chia tuk lai ti a fiang.—Malakhi 3:6.

  A hmaan lomi ruahnak: Mi Tampi Thahnak cu Pathian nih Judah mi dan a tat hnanak a si.

 A hmaanmi: Kumzabu pakhatnak ah Pathian nih Rom mi kha Jerusalem khua hrawhnak nawl a rak awnh hna. (Matthai 23:37–24:2) Mah caan thawkin Pathian nih miphun pakhat kha a hleiin mithmai ṭha a pe ti lo asiloah dan a tat ti lo. Pathian hmuhnak ah “Judah mi le Jentail mi tiin i thleidannak zeihmanh a um lo.”—Rom 10:12.

  A hmaan lomi ruahnak: Dawtnak le ṭhawnnak tling a ngeimi Pathian a um ahcun Mi Tampi Thahnak a um nakhnga lo a tuah ko lai.

 A hmaanmi: Pathian nih sifah harnak hi a chuahtermi a si lo nain a caan ah chikkhat umnak nawl a awnh.—Jeim 1:13; 5:11.

 Pathian nih minung tonmi sifah harnak umnak nawl a awnh caah Mi Tampi Thahnak zong umnak nawl a awnhmi a si. Mah cu a hramthawk minung hna sinin aa thawkmi a hmaan, hmaanlo kong tawnghthamnak caah a si. Baibal nih atu vawlei uktu cu Pathian si loin Satan a si tiah fiang tein a langhter. (Luka 4:1, 2, 6; Johan 12:31) Baibal nih a langhtermi a hrampi a kong pahnih nih Mi Tampi Thahnak Pathian nih umnak nawl a awnhnak a ruang kha a fianter.

1.   Pathian nih minung a ser tikah zalong tein thimnak nawl a pek. Pathian nih hmasa bik minung, Adam le Evi sinin zeidah aa ruahchan ti kha a chimh hna nain a nawl ngaih awkah a hnek hna lo. Anmah tein a ṭha le a chia kha an i thim. A ṭha lomi an i thim ruang—le minung tuanbia ah anmah bantukin a ṭhalomi aa thimmi hna ruangah harnak a chuak. (Genesis 2:17; 3:6; Rom 5:12) Cauk pakhat (Statement of Principles of Conservative Judaism) nih hitin a ti: “Vawleicung i a ummi sifah harnak tam deuh cu pek kan simi zalong tein thimnak nawl kha ningcang loin kan hman caah a si.” Pathian nih kan zalonnak kha lakpiak ṭhan canah amah tel loin minung kha mah tein i tlangtlak awkah caan a pek.

2.   Mi Tampi Thahnak ruangah a chuakmi sunghnak vialte kha Pathian nih a tawnghtham khawh i a tawngh zong a tawnghtham lai. Mi Tampi Thahnak ah thah a tongmi hna i telin mithi nuai tampi kha Pathian nih ka nunter ṭhan hna lai tiah bia aa kam. Mi Tampi Thahnak in a luatmi nih an tonmi ṭih a nung tukmi hmuhtonnak hna zong a philhter hna lai. (Isaiah 65:17; Lamkaltu 24:15) Minung cung i Pathian dawtnak nih mah biakam a tling lai ti kha a kan zumhter.—Johan 3:16.

 Mi Tampi Thahnak in a luatmi hna cu Pathian nih ṭhatlonak umnak a awnhnak a ruang le mah ruangah a chuakmi thil hna kha a tawnghtham lai timi hngalhnak nih zumhfek tein um peng awkah a bawmh hna.