Baibal nih hitin bia a kan kamh: “Pathian duhnak a tuahmi cu zungzal in an nung.” (1 Johan 2:​17) Pathian nih zeidah tuah seh ti aan duh?

• Pathian le a Fapa Jesuh kong kha cawng. Pathian sin thla a cam lioah Jesuh nih hitin a ti: “Pathian taktak a simi nangmah hngalh le nangmah nih na thlahmi Jesuh Khrih hngalh hi zungzal nunnak cu a si.” (Johan 17:3) Pathian le Jesuh kha zeitindah kan “hngalh” khawh hna? Baibal hlathlainak thawngin le Baibal lamhruainak ningin kan nunnak thawngin kan hngalh khawh hna. a Baibal ah nunnak a kan Petu, Sertu, Jehovah Pathian i a ruahnak hna aa tel. (Lamkaltu 17:24, 25) Cun Baibal ah “zungzal nunnak bia” a kan cawnpiaktu Pathian Fapa, Jesuh kong zong aa tel.​—Johan 6:​67-​69.

• Jesuh tlanhnak man raithawinak kha zum. Jesuh vawleicung a ratnak cu ‘mi tampi an rian ṭuanpiak awk le annih tlanhnak caah a nunnak pek awkah’ a si. (Matthai 20:28) Jesuh tlanhnak man raithawinak nih vawlei Paradis ah zungzal nun dingin lam a kan hunpiak. b (Salm 37:29) Jesuh nih hitin a ti: “Pathian nih vawlei hi a dawt hringhran caah a Fapa ngeihchunte kha a pek, cucaah amah a zummi paoh cu an thi lai lo, zungzal nunnak an ngei lai.” (Johan 3:​16) Asinain Jesuh zumhnak men lawngin a za lo ti kha philhhlah. ‘Amah kha zumh taktak’ a hau. Cun a cawnpiaknak ningin le a Pa duhnak ning zongin nun a hau.​—Matthai 7:​21; Jeim 2:​17.

• Pathian he a ṭhami hawikomhnak ngeih i zuam. Pathian nih ka naih hna sehlaw ka hawikom si hna seh ti a kan duh. (Jeim 2:​23; 4:8) Pathian cu zungzal in a nungmi a si. Zeitikhmanh ah a thi bal lo i a hawile zong zungzal in nung hna seh ti a duh. Pathian nih amah a kawlmi vialte hna caah a duhnak kha Baibal ah hitin a langhter: “Zungzal in thluachuah in um ko hna seh.”​—Salm 22:26.

A Hmaan Lomi Ruahnak: Zungzal nunnak cu mi a simh lai.

A Hmaanmi: Zungzal nunnak cu a kan dawtu le i nuam hna seh ti a kan duhtu Pathian sinin a rami a si. (Jeim 1:​17; 1 Johan 4:8) Pathian nih kan i nuamh nakhnga sullam a ngeimi rian kan herh ti kha a hngalh. (Phungchimtu 3:​12) Vawleicung ah zungzal in a nung dingmi hna nih anmah le an dawtmi hna caah ṭhatnak a chuahter hngami, lungsinak a pemi le sullam a ngeimi rian an ngei lai tiah Pathian nih bia aa kam.​—Isaiah 65:22, 23.

Mah lengah zungzal nunnak a hmumi hna nih Sertu kong le a sermi khuaruahhar thil kong hna kha a thar in an cawn peng rih lai. Minung cu zungzal nun duhnak le Pathian kong hngalh duhnak lungthin he ser kan si. Asinain “Pathian nih a tuahmi kha tling tein hngalh khawhnak kha cu a kan pe lo.” (Phungchimtu 3:​10, 11) Cucaah zungzal nunnak a hmumi hna nih hngalh duh awk a simi thil cawn ding le tuah ding an ngei peng lai.