Zoh a nuammi video i telin lung a nuamhter lomi thawngpang hna kha TV, phone, tablet le computer hna ah atu le atu kan hmuh cang hna.

 Mah thawngpang hna kha ngakchia pawl zong nih an zoh.

 Thawngpang chia hna ruangah lungdong in an um nakhnga lo na fale kha zeitindah na bawmh khawh hna?

•  Thawngpang nih na fale kha zeitindah a hnorsuan khawh hna?

•  Thawngpang ruangah na fale lungrethei in an um nakhnga lo zeitindah na bawmh khawh hna?

•  Na fa nih ngaihchiat awk a simi thil a hmuh ah tah zeitin?

•   Ngakchia tampi cu ngaihchiat awk a simi thil an hmuh tikah an lung a dong. Ngakchia cheukhat nih cun an intuarnak kong kha an chim lo nain ngaihchiat awk a simi thawngpang ruangah an lung a dong tuk. a Nulepa an lungre a theih deuh ahcun an lungre a thei deuh ve.

•   Thawngpang an theihmi ruangah fale nih a pingin khua an ruah khawh. Tahchunhnak ah, fale cheukhat nih an hmuhmi thawngpang ningin an chungkhar cungah a cang lai tiah an ruah. Cucaah lung a nuamhter lomi thawngpang atu le atu a zohmi ngakchia pakhat nih mah bantuk lawngte a cang peng tiah a ruah khawh men.

•   Thawngpang ningin a taktak ah thil sining a ṭhat le ṭhat lo kha ngakchia nih an hngalthiam men lai lo. Ngakchia pawl nih an theih rih lomi cu thawngpang a thlahtu hna caah a zohtu an tam deuh paohah a miak an hmuh deuh timi kha a si. Cucaah lung a cawlcanghtermi thawngpang a si khawh nakhnga a zohtu hna nih zoh an duh chinmi phun in an tuah peng.

•   Lung a nuamhter lomi thawngpang zoh awkah a caan kha rikhiahpiak hna. Mah cu na fale nih vawleicung ah a cangmi kong kha an hngalh a hau lo tinak a si lo. Asinain lung a nuamhter lomi thawngpang lawngte theih cu a ṭha lomi a si.

   “A caan ah kan nuva in thawngpang chia kong kha a dikthliar in kan i ruah tawn. Mah kong an theihmi nih kan fale a hnorsuan hna ti kha kan rak hngal lo.”—Maria.

   Baibal phunglam: “Lungretheihnak nih minung cu lunglawm loin a tuah.”—Phungthlukbia 12:25.

•   Lungsau tein ngaihpiak hna law zawnruahnak he lehrulh hna. Na fa nih a cangmi kong kha chim awkah aa harh ahcun hmanthlak in suaiter. Thinphannak a ngeihmi kha a ṭhat deuh nakhnga bia sawhsawh tein chim. A herh lo ahcun a konglam kha a dikthliar in chim hlah.

   “A pawngah ṭhu in a bia kan ngaihpiak tikah kan fanu cu aa nuam deuhmi a lo. ‘Mah hna cu a cang lengmangmi a si ko, zeidah a poi’ tiah kan ti ahcun aa nuam lai lo.”—Sarahi.

   Baibal phunglam: “Biachim lei . . . cun a khul a nuarmi si u.”—Jeim 1:19.

•   A cang taktakmi thawngpang kong kha an hngalh nakhnga bawm hna. Tahchunhnak ah, tangka hmuh duh ah mi pakhat an tlaih timi thawngpang nih a taktak ah a cangmi nakin thil sining cu a chia deuh tiah a ruahter khawh. Cucaah ṭhatlonak a ton nakhnga lo na huhphenhmi a si timi kong kha fiang tein chim. Cun a cang bal tuk lomi a si caah aa phundangmi thawngpang a sinak a si ti zong kha philhhlah.

   Na fale kha lungthinlei zongin bawm hna. Ruahnak hnuah intuarnak nih a zulh caah a ṭhami thil ah lungthin an pek nakhnga na fale kha bawm hna. Cutin nan tuah ahcun an hun i nuam lai.”—Lourdes.

   Baibal phunglam: “Mifim nih cun bia a chim hlanah a ruah hmasa, cucaah a chimmi cu hmual a ngei.”—Phungthlukbia 16:23