CHUNGKHAR CAAH BAWMTU
Dawtnak Langhter Khawh Ning
Kum a hun liam tikah nuva cheukhat nih pakhat le pakhat cungah dawtnak an langhter tuk ti lo. Nan chungkhar ah cutin a si ahcun na lungre a theih awk a si maw?
Na hngalh awk a simi
Dawtnak cu chungkhar fehternak ah a biapi tukmi a si. Ngandamnak caah hmaan tein rawl ei le ti din cu a biapi tukmi a si bantukin dawtnak langhter peng cu chungkhar nuamhternak le fehternak caah a biapi tukmi a si. An i umnak cu kum tampi a rauh cang hmanhah nuva hna nih pakhat le pakhat an i dawt le an zawn an i ruah kha an langhter zungzal a hau.
Dawtnak taktak cu amah zawn lawng aa ruat lo. Midang nuamhnak ding kha a kawl. Cucaah a lung a thawh tik lawngah dawtnak langhter si loin zawnruahnak a ngeimi innchunghawi nih cun a innchunghawi nih a herhmi dawtnak kha a langhter lai i a duhnak kha zulh awkah aa zuam lai.
Nupile nih vale nakin dawtnak kha tam deuh an herh. A va nih a nupi kha a dawt tuk men lai. Asinain a dawtnak kha zingka le zanlei lawng asiloah nupa sinak an tuah hlan lawngah a langhter ahcun a nupi nih a ka daw taktak hnga maw tiah lunghrinnak a ngei kho. Cucaah zei tik caan paoh ah dawtnak langhter cu a ṭhami a si.
Na tuah khawhmi
Dawtnak kha bia in langhter. “Kaan dawt tuk” asiloah “Ka caah na sunglawi tuk” ti bantukin na chimmi bia nih na innchunghawi lung a lawmhter khawh.
Baibal phunglam: “Kaa nih cun lung chung i a khatmi kha pei a chim cu.”—Matthai 12:34.
Ruahnak cheuhnak: Na dawtnak kha bia lawngin si loin a dang lam zongin langhter. E-mail asiloah message in ca kua.
Dawtnak kha tuahsernak in langhter. Kuh, hnamh asiloah kut tlaih tibantuk tuahnak thawngin innchunghawi na “dawt” taktak kha na langhter khawh. Dawtnak in pehtlaih, dawtnak mit in ven asiloah a caancaan ah laksawng hna cawnpiaknak thawngin na siaherh taktak kha na langhter khawh. Cun na nupi kha bag putpiak, kutka awnpiak, kheng ṭawlpiak le thil sukpiak asiloah rawlchuanpiak ti bantukin na bawmh khawh. Cutin na tuahmi cu dawtnak kha tuahsernak in na langhtermi a si.
Baibal phunglam: “Kan i dawtnak hi hmur le kaa lawnglawng a si awk a si lo, . . . thiltinak ah a langmi dawtnak a si awk a si.”—1 Johan 3:18.
Ruahnak cheuhnak: Nan rak i duhka lio bantukin na innchunghawi kha zawnruahnak he pehtlai.
Pakhat le pakhat a caan i pe u. Nan pahnih lawngin caan hmanṭinak nih na chungkhar a fehter khawh, na innchunghawi kha amah he nan um tikah naa nuamh kha hngalhter. Fa asiloah rian a ngeimi nan si ahcun nan pahnih lawngin caan hmanṭi khawh awkah a har men lai. Cucaah nan pahnih lawngin lamlenṭinak ti bantuk thil pakhatkhat tuahṭi awkah nan timhtuah khawh.
Baibal phunglam: “A ṭha bik i thim awk kha nan hngalh lai.”—Filipi 1:10.
Ruahnak cheuhnak: A rian a tam tukmi nuva hna nih an pahnih lawngin caan hmanṭi khawh awkah zan asiloah zarhte zarhpi ah caan hmanṭi dingin an timhtuah.
Na innchunghawi kha hngalhthiampiak. Dawtnak kan herh ning cu pakhat le pakhat aa lo cio lo. Zeitindah dawtnak langhter nan duh, cun tam deuh langhter a herh maw ti kha hmunkhat ah i ruahṭi u. Cun na innchunghawi duhnak kha zul. Dawtnak cu chungkhar fehternak ah a biapi tukmi a si kha philhhlah.
Baibal phunglam: “Dawtnak cu . . . amah zawn lawng aa ruat lo.”—1 Korin 13:4, 5.
Ruahnak cheuhnak: Dawtnak langhter dingin hal canah, hitin i hal, ‘Ka cungah ka innchunghawi nih dawtnak a ngeih chin nakhnga zeidah ka tuah khawh?’