Nulepa tampi nih social media ṭih a nunnak kha ruat in an fale kha hmannak nawl an awnh hna lo. Asinain kumhra fai a simi nan fale kha hmannak nawl nan awnh hna ahcun ṭih a nungmi thil hna hrial khawh awk le fimkhur tein hman thiam ning cawn awkah zeitindah nan bawmh khawh hna?

Hi capar ah

•  Kumhra fai pawl caah a biapi bikmi

•  Kumhra fai pawl i lungthinlei ngandamnak

•  Kumhra fai pawl i online tuahsernak

•  Lamhruainak kha i ruahṭi u

 Hngalh awk a simi: Social media cu mi a lem khomi a si caah kumhra fai nan fale nih a caan an hman ning i uk khawh awkah nulepa bawmhnak an herh.

 Baibal phunglam: “A biapi deuhmi thil kha hngalh i zuam.”—Filipi 1:10, NW.

 Ruah dingmi: Social media kha kumhra fai a simi nan fale nih ihcaan, sianginn ca tuahnak asiloah chungkhar he caan hmanṭinak hnorsuan tiangin an hmang maw? Kumhra fai a simi hna nih zankhat ah suimilam pakua hrawng ihcaan an herh tiah hlathlaitu hna nih an chim. Asinain nikhat ah suimilam tampi chung social media a hmangmi hna cu ihcaan suimilam pasarih nak tlawm lawng an ngei men lai.

 Na tuah khawhmi: Kumhra fai a simi nan fale he a biapimi thil kong kha i ruah u law social media hmannak caan kha fimkhur tein rikhiah awk a sinak a ruang zong i ruah u. Zan ah ihnak khaan ah electronic thilri chiah lo ding ti bantuk a tlarimi dingrep hna ser u. Nan hmuitinh cu nan fale kha mahle mah aa uk khomi si dingin bawmh kha a si. Mah sining cu an upat tikah bawmtu taktak a si lai.—1 Korin 9:25.

 Hngalh awk a simi: Mino pakhat nih an remh chommi le an hawile he nuamhnak an tuahmi thil lawng a langhtermi midang hmanthlak kha a zoh tikah a li a leng lai i lungrethei le lungdong in a um men lai.

 Baibal phunglam: “Nahchuahnak ngei ti hlah u.”—1 Peter 2:1.

 Ruah dingmi: Social media nih kumhra fai a simi nan fale kha an muisam le an pumrua he aa tlaiin a ṭha lomi hmuhnak a ngeihter kho hna maw? Midang nunning cu lung cawlcangh awk tuk a si nain kei ka nunning tu cu lungrawk a si tiah nan fale nih an ruat maw?

 Na tuah khawhmi: Midang he i tahchunh ṭih a nunnak kong kha nan fale he i ruah u. Mah nih pa nakin nu pawl kha a hnorsuan khawh deuh hna, zeicahtiah nu pawl cu pehtlaihnak le pumrua ti bantuk kong kha biapi deuh ah an chiah caah a si. Social media hmannak kha amahle caante ah ngol dingin ruahnak nan cheuh khawh hna. Mino pa Jacob timi nih hitin a chim: “Social-media app kha chikkhat chung ka delete. Mah nih biapi ah ka chiahmi thil le keimahle keimah i telin midang ka hmuh hna ning kha i remh awkah a ka bawmh.”

 Hngalh awk a simi: Social media hmannak cu mibu hmaiah um he aa lo. Pakhat le pakhat i theihsualnak le lung i khah lonak hna cu a phung a si ko.

 Baibal phunglam: “Lungthli in i uamnak le thinhunnak le ingpuannak kha hlaw hna u. I hua ti hlah u, i vawlpam ti hlah u. . . . Pakhat le pakhat cungah zaangfahnak lungthin le nemnak lungthin ngei u.”—Efesa 4:31, 32.

 Ruah dingmi: Social media nih nan fale kha mikong ceihnak, i dohnak le zaangfahnak ngei loin biachimnak hna ah a telter hna maw?

 Na tuah khawhmi: Nan fale kha online ah ziaza ṭha langhter dingin cawnpiak hna u. Digital Kids timi cauk ah hitin a ti: “Nulepa rian pakhat cu fale nih pumpak in asiloah internet in pehtlaihnak ah a puarhrangmi si cu cohlan awk tlak a si lo ti fiang tein an hngalhthiam nakhnga cawnpiak kha a si.”

 Internet hman cu a herh hrimhrimmi a si lo ti le nulepa tampi nih kumhra fai an fale kha internet hmannak nawl an awnh hna lo ti kha i cinken. Nan fale cu a caan he aa tlaiin rikhiak ding, a ṭhami hawikomhnak ngeih ding le aa tlak lomi thil hrial khawh ding tiangin an cuza cang ti nan hngalh lawngah internet hman dingin nawl nan awnh hna awk a si.