CHUNGKHAR CAAH BAWMTU | ṬHITUMNAK
Lungsaunak Ngeih Khawh Ning
“Lungsaunak timi cu nuva hna nih nifatin an tonmi hneksaknak pakhat a si. Nupi, va na ngeih hlan ahcun lungsaunak cu a biapi tuk lomi a lo men lai. Asinain chungkhar nuamhnak ca ahcun a biapi tukmi a si.”—John.
Zeicah lungsaunak ngeih a herh?
Nupi, va ngeih hnuah innchunghawi i an derthawmnak kha ṭha tein hngalh khawh a si.
“Umṭinak caan a hun sau deuh tikah innchunghawi i a ṭha lomi a ziaza hna kha biapi ah kan hun chiah tawn. Cu bantuk caan ah lungsaunak langhter cu a fawi lomi a si.”—Jessena.
Lungsau lonak nih ruah hmasa loin bia aan chimter khawh.
“Ka intuarnak kong kha khulrang tein ka chim colh, cucaah chim awk a si lomi bia hna kha ka chim tawn. Ka lungsau deuh sehlaw chim awk a si maw, si lo ti kha ka tuaktan khawh lai i chim lo awkah biakhiahnak ka tuah khawh lai.”—Carmen.
Baibal nih hitin a ti: “Dawtnak cu thlachiat a ruat i mi cungah zaangfahnak a ngei.” (1 Korin 13:4) Pakhat le pakhat aa dawmi hna nih cun pakhat le pakhat cungah lungsaunak an langhter ko lai tiah kan ruah men lai. Asinain a zungzal in cun a fawi lo. A hmasa ah langhtermi John nih hitin a ti, “a dang kan ngeihmi sining ṭha hna bantukin, lungsau nakin lungsau lo hi a fawi deuh. Cucaah a lung a saumi si awkah fakpi in i zuam a hau.”
Lungsaunak kha zeitindah na langhter khawh?
Ruahlopi in a cangmi thil nih na lungsaunak kha a hneksak tikah.
Tahchunhnak ah: Zaangfahnak ngei loin na inchunghawi nih bia a chim tikah zaangfahnak ngei loin lehrulh na duh ve men lai.
Baibal phunglam: “Na thin sum khawh kha i zuam, lungchung in mi uam peng hi hruh a si.”—Phungchimtu 7:9.
Lungsaunak langhter khawh ning: Chikkhat hngakta. Na lehrulh hlanah na inchunghawi nih na lung fahter awkah hramhram in a chimmi a si lo ti kha i cinken. “Nuva tam deuh nih an innchunghawi nih an chim duhmi bia nakin a sullam tu kha biapi ah chia in an lehrulh hna” tiah Fighting for Your Marriage timi cauk nih a ti.
Na inchunghawi nih na thinhunter dingin aa zuammi a si hmanhah lungsaunak na langhter ahcun thil sining kha a chiat chin nakhnga lo na tuah khawh lai. Baibal nih “thing a um lo ahcun mei cu a mit” tiah a ti.—Phungthlukbia 26:20.
“Na nupi kha na ral bantukin na hun ruah ahcun mah ruahnak kha ngol law na dawtnak a ruang tu kha ruat. Cun a duhmi thil pakhatkhat kha tuahpiak colh.”—Ethan.
Ruah awk:
Na inchunghawi nih na lung aan fahtermi bia a chim asiloah thil pakhatkhat a tuah sual tikah zeitindah na lehrulh?
A hnuah cutin a tuah ṭhan ahcun zeitindah lungsaunak na langhter khawh?
Na thin aan huntermi thil kha na innchunghawi nih atu le atu a tuah tikah.
Tahchunhnak ah: Na inchunghawi cu a tlai peng, na hngah peng i na hngahnak caan a sau deuh tikah na thin a hung.
Baibal phunglam: “Pakhat le pakhat i ngaithiam u law i bawm u.”—Kolose 3:13.
Lungsaunak langhter khawh ning: Nangmah na herhmi nakin na inchunghawi herhmi tu kha biapi deuh ah chia. Hitin i hal, ‘mah ruang i kan i sik ahcun thil sining cu a ṭha deuh lai maw asiloah a chia chin lai dah?’ Cun “kan dihlak hin palhnak kan tuah cio tawn” ti zong kha philh hlah. (Jeim 3:2) Mah cu nangmah lei zongin tuah naa zuam dingmi thil a um tinak a si.
“A caan ah ka vapa cung nakin ka hawile cungah ka lung a sau deuh. Kan umṭinak caan a sauh deuh tikah a tlin lonak hna kha ka hun hngalh caah a si men lai. Asinain ka lung a sau ahcun ka vapa cungah dawtnak le upatnak ka langhtermi a si i mah cu kan innchungkhar caah a biapi tukmi a si.”—Nia.
Ruah awk:
Na inchunghawi tlinlonak cungah zeitluk in dah lungsaunak na ngeih?
Hmailei ah zeitindah lungsaunak tam deuh na langhter khawh?