“Mah nih ser chommi thilri hmangin lente i celh” timi cu ngakchia nih tuah chun duhnak le tuaktan khawhnak lungthin a ngeih nakhnga forh kha a chim duhmi a si. Mah nih ngakchia i a ruahnak, a intuarnak le a sining hna kha a ṭhanchoter.

 Tahchunhnak ah:

•   Hmanthlak suai

•   Changreu ser

•   Mithlam cuanter buin lente i celh

•   Hlasak

•   A rong thuhmi thing hna hmangin lente i celh

•   A sawhsawhte a simi thilri hmangin lente i celh (cauk pung fatete hna hmang zongin lente i celh) khawh a si.

 Ram tampi ahcun mah nih serchommi thilri hna hmangin lente i celh nakin video zoh le timhtuahciami thil sining hna ningin lente i celh kha a tam deuh.

 Mah cu biapi ah chiah dingmi thil a si maw?

•  Na hngalh awk a simi

•  Na tuah khawhmi

•   Mah nih serchommi thilri hna hmangin lente an i celh tikah ngakchia pawl an ṭhancho ning cu a rang deuh. Pumsalei le lungthinlei ah an ngan a dam, anmah tein thilri hna kha an ser khawh i mah nih midang he hawikomh a thiammi zong a siter hna. Cun an lung a sauter hna, biakhiahnak a tuahter khawh hna, an ruahnak a ukter khawh hna i a phu in lente an i celh tikah ṭha tein an i celh kho. Mah cu an upat tik ca zongah bawmtu a si.

•   Electronic media tam tuk hmannak nih ṭhatlonak a chuahter khawh. Mah thil hna hmannak nih a lem khawh hna. Cun a luan in a thauter khawh hna i a puarhrangmi le ralchanh a hmangmi zong a siter khawh hna. Mah cu siangdoruun a kai dingmi ṭhi a simi an fale Internet a hmantermi nulepa hna caah ralrin peknak a si.

•   Timhtuahciami thil sining hna ah derthawmnak a um. Nulepa timhtuahciami thil sining ningin tuahnak nih fale khuaruah khawhnak kha a nuarhter i mah tein serchom duhnak lungthin an ngeihmi kha a dawnhkhanh khawh.

•   Ngakchia pawl kha mah nih serchommi thilri hmangin lente i celh awkah caanṭha pe hna. A si khawh tik caan paohah ngakchia pawl nih kokek thil hna kha an hmuh nakhnga a lengah lente celhter hna. Cun an huam phun le anmah nih an serchommi thil hna zongin lente celhter hna. a

   Ruah awk a simi: Mah nih serchommi thilri hmangin lente i celhnak nih ka fa i zei a sining dah a ṭhanchoter khawh?

   Baibal phunglam: “Pum in thiam lakin cawnmi kha santlaihnak a ngei.”—1 Timote 4:8.

•   Screen zohnak caah a caan rikhiak. Ngakchia an ngam nakhnga caah phone, tablet asiloah TV hman cu aa tlak lai maw? Siibawi pawl nih kumhnih tang a simi ngakchia pawl cu screen zohter awk an si lo i kumhnih in kumnga kar ngakchia pawl cu nikhat ah suimilam pakhat lawng zohter awk an si tiah an ti. b

   Ruah awk a simi: Ka fa kha screen zoh lo awkah zeitindah ri ka khiahpiak khawh? Ka fa he kan zohṭi lai maw? Mah thil hna zoh canah zei kan tuah ah dah a ṭhat deuh lai?

   Baibal phunglam: “Zeitindah kan nuncan a si ti kha ṭha tein i zoh u. Mihrut bantukin um hlah u, mifim bantukin um u . . . caanṭha nan hmuhmi paohpaoh kha ṭha tein hman i zuam u.”—Efesa 5:15, 16.

•   Timhtuahciami thil sining hna ningin tuah hlanah ṭha tein ruat. Mah nih ngakchia pawl i an thil tuah khawhnak a ṭhanchoter ti cu a hmaan ko. Asinain timhtuahciami thil tampi nih ngakchia pawl kha an lung a tuaiter hna lengah nulepa zong dawn le thlah rian a ngeihter khawh hna. Cucaah caanṭha nan hmuhmi paohpaoh kha ṭha tein hman i zuam u timi Efesa 5:15, 16 i Baibal phunglam cu mah thil sining zongah aa pehtlaimi a si.

   Ruah awk a simi: Ka fale nih an tuah dingmi thil a tam tuk maw? A tam tuk ahcun zeitindah kan ṭhumhpiak khawh hna?

   Baibal phunglam: “A biapi deuhmi thil kha hngalh i zuam.”—Filipi 1:10, NW.