CHUNGKHAR CAAH BAWMTU
Mark Ṭhat deuh awkah Fale Bawmh Khawh Ning
Na fa cu sianginn ca zoh a huam lo, inn ah tuah dingmi ca kha a tuah lo i ca zong a ciah lo. Cucaah a mark a ṭum i a ziaza zong a hun rawk. Na fa kha a mark a ṭhat deuh nakhnga zeitindah na bawmh khawh?
Hngalh awk a simi
Hneknak nih thil sining kha a chiatter chin. Na hnek tuk ahcun na fa cu sianginn le inn ah lungrethei in a um kho. A lungretheihnak a zor deuh nakhnga lih a hun chim men lai, a mark a ṭummi kha chim loin a um men lai, sianginn mark cazin ah na minthut deu kha a hman men lai asiloah sianginn hmanh a tli men lai. Cuticun thil sining cu a chia chin.
Laksawng peknak nih aa ralkahmi thil a chuahter khawh. Pa pakhat a simi Andrew nih hitin a ti: “Kan fanu kha i zuam seh ti kan duh caah a mark a ṭhat deuh tikah laksawng kan pek. Mah tikah kan fanu nih laksawng hmuh ding lawng kha a hun ruah. A mark a tlawm deuh tikah a mark a tlawm caah si loin laksawng a hmuh lo ca tu ah a ngaih a chia deuh.”
Saya/ Sayamah te sualphawt cu na fa caah a ṭhahnem lo. Na fa nih ka mark a ṭhat deuh nakhnga i zuam a hau lo tiah a ruah khawh men. Midang kha sual a phawt men hna lai, cun a tonmi buaibainak kha tawnghthampiak awkah midang kha a hun i bochan men hna lai. A tawinak in chim ahcun a upat tikah a biapimi rian hna kha ṭuanvo a la kho lai lo.
Na tuah khawhmi
Na intuarnak kha i uk. Na thin a hun lioah na fa he a mark kong kha i ruahceihṭi hlah u. Pa pakhat a simi Brett nih “kan lung a daih lio caan ah i ruahceihṭi cu kan nuva caah a ṭha bikmi a si” tiah a ti.
Baibal phunglam: “Bia theih duhnak lei ah cun a khul a rangmi si u law biachimnak lei le thinhunnak lei ah cun a khul a nuarmi si u.”—Jeim 1:19.
Buaibainak taktak kha hngalh i zuam. Midang nih nehsawhnak, sianginn i ṭhialnak, camipuai ṭihnak, chungkhar buaibainak, i hngilh khawh lonak, ṭha tein cazin ngei lonak le lungthin pek khawh lonak ti bantuk ruangah a mark a ṭummi a si men lai. A tha a thut tuk caah a si tiah ruat hlah.
Baibal phunglam: “An in cawnpiakmi kha ṭha tein ruat law khuaawng na tong lai.”—Phungthlukbia 16:20.
Ca zoh khawh awkah a daimi pawngkam kha timhtuahpiak. Inn ah tuah dingmi ca tuahnak le ca ciahnak caah cazin tuahpiak. Ca zohnak in na fa a lung a vaivuanhter khomi thil (TV le phone i telin) hna a um lonak hmun kha timhtuahpiak. Ca zohnak caah a caan tawite in ri khiahpiak law lungthin a pek khawh nakhnga bawm. Germany ram i pa pakhat a simi Hector nih hitin a ti: Camipuai a naih tikah camipuai ni a phanh dengmang tiang hngak loin nikhat ah tlawmpal tete in kan zohpi ṭhan.”
Baibal phunglam: “Zeizong vialte caah hin caan a um cio.”—Phungchimtu 3:1.
Cawn duhnak ngeih dingin thape. Na fa nih sianginn kai a ṭhatnak kong hna kha ṭha tein a hngalh ahcun cawn duhnak a ngei deuh lai. Tahchunhnak ah, kanan a thiam ahcun changreu cawknak ca tangka tuak dan a thiam lai.
Baibal phunglam: “Fimnak kha cawng. Hngalhthiamnak kha cawng. . . . Na lung chungah i chiah.”—Phungthlukbia 4:5, NW, 8.
Ruahnak cheuhnak: Inn ah tuah dingmi ca kha zohpi, asinain a ca kha nangmah nih tuahpiak hlah. Andrew nih hitin a ti: “Kan fanu nih amah thluak kha hmang loin kanmah lawngte a kan hal.” Cucaah na fa kha amah tein ca zoh ning kha cawnpiak.