“Kan fanu kum ruk a si lioah zu kong he aa tlaiin a hmasa bik kan rak chimh. Kan ruahnak lengin a hngalh deuh caah kan khuaruah a har.”​—Alexander.

•  Hngalh awk a simi

•  Na tuah khawhmi

•  Zu kong he aa tlaiin Baibal chimmi

Fale zu kong chimh cu a biapimi a si. Na fa cu kumhra fai a si tiang hngak hlah. “Kan fapa kha zu a zafang in dinnak kong he aa tlaiin a ngakchiat deuh lioah rak chim u sih law a ṭha tuk hnga” tiah Russia ram ah a ummi Khamit nih a ti. “Cutin chimh a biapitnak cu a hnu lawngah ka hngalh. Atu cu kum 13 a simi kan fapa cu zu a ding peng cang.”

Mah kong cu zeicah biapi ah na chiah awk a si?

• Sianginn kaiṭihawi, thanhlaar le TV program hna cu zu kong he aa tlaiin na fale an hmuhning cungah huham an ngei kho.

• US i Zawtnak Khamhnak le Kilvennak ningin United States ah zu a dingmi zatuak in 11 cu kumtling lo an si

Nulepa nih fale an ngakchiat lioin zu kong chimh awkah siilei fimthiamnak a ngeimi hna nih an forhmi hna cu khuaruahhar awk a si lo. Zeitindah na tuah khawh?

Na fa biahalnak kha leh awkah i timchung. Ngakchia pawl nih zei paoh hngalh an duh, a hleiin mino pawl nih hngalh duhnak an ngei. Cucaah an halmi paoh leh khawh awkah ṭha tein i timtuah. Tahchunhnak ah:

• Na fa nih zu a thawtnam kong he aa tlaiin hngalh a duh ahcun wine cu a thur i beer cu a kha tiah chim.

• Na fa nih zu din chun a duh ahcun ngakchia pum caah zu din cu a ṭha lo ti kha na chimh khawh. Zu dinnak nih mi a hrimhter asinain tam tuk dinnak nih lung a mihter i a hnuah i ngaihchih dingmi bia a chimter khawh ti kha chim.​—Phungthlukbia 23:29-​35.

Nangmah theng nih hlathlai. Baibal nih hitin a ti: “Mifim cu a fim i zei thil paoh kha a thuhphenh.” (Phungthlukbia 13:16) Zu dinnak he aa tlaiin hngalhnak ngei. Cun zu he aa tlaiin nan ram upadi le ri an khiahmi kha hlathlai. Cutin na tuah ahcun na fale kha ṭha tein na bawmh khawh hna lai.

Zu kong he aa tlaiin nangmah nih chim hmasa hna. Britain ram i Mark timi pa pakhat nih hitin a ti: “Zu dinnak nih ngakchia pawl kha an lung a tuaiter khawh hna. Kum riat a simi ka fapa kha zu din hi a ṭha maw asiloah a ṭha lo dah tiah ka hal. Caan a rem lioah a hmuh ning kha ka hal caah zalong tein a ka chimh.

Zu kong he aa tlaiin caanṭha kan ngeih fatin kan chimh hna ahcun an i cinken ko lai. Na fale an kum cungah i hngat in zu kong lawng si loin mawṭaw le lam kong he aa tlaimi dingrep zong kha chim hna. Cun nupa sinak kong zong kha chim hna.

Zohchunhawk ṭha si. Ngakchia pawl cu ti a dopmi thil bantuk an si caah an pawngkam ah a ummi thil sining hna kha an cawn. Cucaah nulepa cu an fale cungah huham an ngei tuk tiah hlathlaitu hna nih an ti. Na lungretheihnak zorter awkah zu a dingmi na si ahcun na fale nih zu cu thadamnak caah dinmi sawhsawh in an hmuh lai. Cucaah zohchunhawk ṭha si. Zu kha a zafang lawngin ding.