Phone timi cu a ṭhawngmi electronic hriamnam bantuk a si. An hman ning cungah i hngat in ṭhatnak le ṭhatlonak a chuak kho. Phone kha fimkhur tein hman awkah na fale kha zeitindah na cawnpiak khawh hna? Tahchunhnak ah, nikhat ah zei can dah phone na hmanter hna lai? a

•  Na hngalh awk a simi

•  Na tuah khawhmi

•  “Dawtnak a ngeimi nulepa nih cun dingrep an chiahpiak hna”

•   Phone a hmangmi hna cu harnak an tong kho. “Fale le Phone—Ṭhen 1nak: Ka Fale Kha Phone Ka Hmanter Hna Awk A Si Maw?” timi capar ningin phone ngeih ahcun Internet ah taarmi a ṭhami he a ṭhalomi he zoh khawh a si.

   “Phone nih fale kha ṭih a nungmi ruahnak le mi pawl he pehtlaihnak a tuahter khawh hna ti kha nulepa nih an philh tawn.”—Brenda.

•   Fale nih lamhruainak an herh. Mino pawl nih cun sehlei fimthiamnak thilri hna kha an hman peng nain upa pawl nih cun an hmanka lawng a si men lai. Asinain mah cu nulepa nih sehlei thilri kong kha zeihmanh an hngal lo, phone hman ning le zei tikah dah hman ding a si timi cu fale nih an hngalh deuh tinak a si lo.

   Fale nih phone hman ning an thiam deuh caah ṭha tein an hman thiam tinak a si lo. Fale nih sehlei fimthiamnak zeitlukin an hngalh hmanhah fimkhur tein an hman nakhnga nulepa nih lamhruai an hau.

   “Ṭha tein cawnpiak hmasa loin phone hmanter cu mawṭaw mawngh a cawng bal lomi ngakchia pakhat kha tawh pek, a mawngtu ṭhutnak ah ṭhutter le engine nunter in ‘ṭha tein mawng’ tiah ti he aa lo.”—Seth.

•   Na fa nih a hmanmi phone kong he aa tlaiin hlathlai. Phone kong kha ṭha tein na hngalh ahcun fimkhur tein hman awkah na fa kha na bawmh khawh lai. Tahchunhnak ah:

   Na fa phone hman caan he aa tlaiin ri na khiahpiak maw?

   Zoh awkah aa tlak lomi pawl a thup khomi setting cu hmual a ngei tuk lo ti kha na hngal maw?

   Na fa nih a hmanmi phone kong kha na hngalh ahcun fimkhur tein hman awkah na bawmh khawh deuh lai.

   Baibal phunglam: “Hngalhnak a ngeimi cu thazaang a ngeimi nakin a ṭhawng deuh.”—Phungthlukbia 24:5.

•   Dingrep chiahpiak hna. Nawl na awnhmi le awnh lomi kong he aa tlaiin biakhiahnak tuah. Tahchunhnak ah:

   Rawl einak cabuai ah phone put dingin nawl na awnh lai maw, chungkhar asiloah hawikom pawl he nan lenṭi lioah phone put dingin nawl na awnh lai maw?

   A ihnak khaan ah phone i put dingin nawl na awnh lai maw?

   Zei bantuk app hna dah hman dingin nawl na awnh?

   Phone kha zei can dah na hmanter lai?

   Nikhat ah suimilam zeizat hman ding tiin ri na khiahpiak maw?

   Dingrep na chiahpiakmi hna kha hngalhter hna. Mah ningin an zulh lo ahcun zei tiang dah ka chimhhrinh hna lai timi kong he aa tlaiin timhtuahnak ngei.

   Baibal phunglam: “Ngakchia chimhhrin cu i sum hlah.”—Phungthlukbia 23:13.

•   Na fa phone kha check. Na fa phone password kha hngalh i zuam law a herh tik caan paohah a phone kha check. Ca an i kuatmi, app a hmanmi, hmanthlak le a zohmi website pawl zong kha check.

   “Chimh cia loin a herh caan paohah na phone kan check lai tiah kan fanu kha kan chimh. Dingrep ningin na hman lo ahcun phone na hman caan kan ṭhumh deuh lai tiah kan ti.”—Lorraine.

   Nulepa cu fale phone an hman ning kong he aa tlaiin hngalhnak nawl an ngei.

   Baibal phunglam: “Ngakchia hmanh nih a tuahmi a ṭhat le a din kha a tuahnak in amah lila nih a langhter ko.”—Phungthlukbia 20:11.

•   Phunglam kha cawnpiak. A hmaanmi thil tuah a duh nakhnga cawnpiak. Cutin tuah awkah zeicah a biapit? Ngakchia cheukhat cu tuah an duh tukmi thil pakhatkhat a um ahcun nulepa hngalh loin an tuah tawn caah a si. b

   Dinfel awk, i sum awk le a tuahmi thil ruangah a chuakmi kha ṭuanvo lak awk ti bantuk a ṭhami sining pawl kha sunsak dingin cawnpiak. A dingfelmi ngakchia nih cun phone kha fimkhur tein a hman.

   Baibal phunglam: “Upa . . . cu chia le ṭha thleidan khawhnak a ngei cangmi an si.”—Hebru 5:14.