Lungpang, tilawng dinhnak hmun hlei le tilawng pum hna ah fek tein aa benhmi cangkeuh pawl kong kha saram kong hlathlaitu hna nih an hlathlai. Cangkeuh in a chuakmi kaw bantuk kha an ser kho rih lo. A cinmi cungah cangkeuh pawl an i benh khawh ning kha scientist pawl nih nai lawngin an hngalh.

 Ruathmanh: Hlathlainak pakhat nih a keuhkami cangkeuh pawl cu ti chungah an kal pah in i benhnak hmun pakhat kha an i thim. Hmun an i hmuh dih in a bangmi thil pahnih kha an chuah. A hmasa bik an chuahmi thil nih an i benhnak ding hmun i ti kha a thianh. Cun a voihnihnak a chuah dingmi, a bangmi thil aa benh khawh nakhnga a timhtuah. Mah a bangmi thil ah phosphoproteins tiah auhmi protein hna aa tel.

 A bangmi thil pahnih fonhmi cangkeuh i a kaw kha bacteria rungrul hna nih an hrawk kho lo. Mah an i thimnak hmun ah an nunchung aa benh dingmi cangkeuh caah mah kaw cu a biapi tukmi a si.

 Cangkeuh nih a chuahmi kaw bantuk an ser tikah an ruah lengin a har ti kha scientist pawl nih an hngalh. Hlathlainak ah aa telmi pakhat nih hitin a ti: “Khuaruahhar a simi kokek a bangmi thil in a chuakmi kaw a si caah a cinnak hmun hmanhah aa benh khawhnak a si.” Mah an hngalhnak thawngin hlathlaitu pawl nih ti lakah hman khawhmi kaw, kokek thilri hmanmi kaw hna an ser khawh lai. Mah bantuk kaw in electronic thilri le pum chungah airolh in rawnmi thilri hna an ser khawh lai.

 Zeitindah na ruah? Cangkeuh in a chuakmi kaw cu amah tein a si kho hnga maw? Asiloah design suaitu pakhatkhat a um hnga maw?