Scientists pawl nih hag nga pum in a chuakmi gel bantukin a bangmi a hang kong an hlathlainak hi a sau cang. Mah a bangmi a hang kong kha zeicah an hlathlai? Hag nga i a bangmi a hang cu “samh le zam a ngahmi a nem bikmi bio thil” a si caah a si.

 Ruathmanh: Hag nga timi cu rili tangah a ummi ngarul (eel) bantuk a si. Nga nganmi nih seh a timh tikah a pum i a bonak zawn tete in gel bantuk a simi a bangmi a hang kha a chuahter. Mah cu a bangmi protein le a dang protein thong tampi aa telmi a bangmi a hang an si. Mah aa fonhmi protein cu hag nga i a pum ah a bangmi a hang ah aa thleng. Mah a bangmi a hang ruangah nga nganmi nih a seh kho lo i a chak ṭhan, cun a zamtak.

 Hag ngai i a bangmi a hang cu aa thleidang tuk. Mah ah aa telmi protein hmul pakhat cio cu minung samfa zakhat ah pakhat tluk hrawng lawng a ṭhia ko nain nylon hri nakin let hra a fek deuh. Mah a bangmi a hang kha rili chung i an tlak tikah kap thum in hmuh khawhmi fingrilh thap he aa lo. Mah a bangmi a hang thap nih amah nakin a let 26,000 in a rit deuhmi ti kha a kham khawh. A taktak ti ahcun mah a bangmi a hang i zatuak ah 100 hrawng cu ti a si.

 Scientists pawl nih ti dah aa telmi mah a bangmi a hang kha i zohchunh in an ser kho lo. Hlathlaitu pakhat nih “mah a bangmi a hang kong cu hngalhthiam awkah a har tuk” tiah a ti. Hlathlaitu cheukhat nih cun bacteria aa telmi protein hmul hna kha chuah awkah an timhtuah. A zang i samh khawh le zam khawh a simi, thleh awkah a har i kokek thil hna a hnorsuang lo dingmi thilri hna kha chuah an duh. Mah protein hmul deu in la le siilei thilri hna kha an chuah khawh lai. Mah lengah a dang lam tampi zong in hman khawh a si lai.

 Zeitindah na ruah? Hag nga i aa thleidangmi a bangmi a hang cu amah tein a si kho hnga maw? Asiloah design suaitu pakhatkhat a um maw?