Insect pawl caah an zuan khawh nakhnga, an kai khawh nakhnga le pawngkam sining an hngalh khawh nakhnga thianhthlimhnak cu a biapi tukmi a si. Tahchunhnak ah, hngerhte a ki a thur ahcun umkal khawhnak, pehtlaih khawhnak le a haw theih khawhnak hna cu an zor lai. Cucaah saramlei kong a hngalmi Alexander Hackmann nih hitin a chim: “A thurmi insect kha na hmu bal hna lai lo. A lenglei thurhnawmhnak kha an tawnghtham khawh.”

 Ruathmanh: Hackmann le a rian ṭuanṭihawi pawl nih hngerhte phunkhat (carpenter ant) a ki nih thianhhlimhnak a tuah ning kha an hlathlai. A ki kha a kut in a reh i a dawh tikah a ki ah aa benhmi, a ngan bikmi hmunthur pawl cu an tla. A hme deuhmi hmunthur pawl tu cu samthih he aa lomi a hmul in a thianh. Minung sam faakhat i cheu 80 lakin cheu 1 hrawng lawng a simi, hmunthur hmetete kha a nemmi a hmul in a thianh.

 Hngerhte a ki nih thianhhlimhnak a tuah ning video kha zoh

 Hackmann le a hawile nih hngerhte ki nih thianhhlimhnak a tuah ning kha sehzung ah hman khawh a si lai tiah an zumh. Tahchunhnak, a khu a vai pawl ruangah a rawk khomi, electronic thilri hmetete pawl chuah tikah mah bantuk thianhhlimhnak tuah ning cu man a ngei tuk lai.

 Zeitindah na ruah? Hngerhte a ki nih thianhhlimhnak ṭha tein a tuah khawh ning cu amah tein a si kho hnga maw? Asiloah design suaitu pakhatkhat a um hnga maw?