Rili ti he aa tawnghnak tilawng pum ah a tomtom in aa benhmi cangkeuh le a dang rili thilnung pawl cu tilawng mawngtu pawl caah hnahnawk ngai an si. Mah kha thilnung thurhnawmhnak tiah auh a si. Mah thurhnawmhnak ruangah tilawng a kal ning cu a nuar deuh i chiti zong a dih deuh. Cucaah atu le atu tilawng kha an dinhter in an thianh tawn. Mah buaibainak tawnghtham awkah scientist pawl nih kokek thilnung kong kha an hlathlai.

 Ruathmanh: A thla a saumi pilot huel nga (Globicephala melas) i a cuar cu amah tein thianhhlimh khawhnak a ngei ti kha an hmuh. A zum tete a ummi a cuar cungah cangkeuh pawl i benh ding cu a fawi lo. A zum tete karah khat lakin a ummi, a khammi a thau ruangah tinaang le bacteria pawl cu an i benh kho lo. Huel nga i a cuar aa thlen fatin a khammi a thau pawl an chuak.

 Scientist pawl nih tilawng pum ah huel nga i amah tein thianh khawhnak lam kha hman chunh awkah an timhtuah. A hlanah cun thilnung thurhnawmhnak a kham khomi sii (antifouling paint) kha an thuh. Asinain mi nih a bik in an hmanmi sii cu rili chungah a ummi thilnung pawl caah siivai a si ruangah kham a si. Thilnung pawl a hnorsuang lomi chemical thil hna a chuahmi a awng hmetete aa telmi a thap kha tilawng a pum ah an thuh. Mah a thap cungah thir bantuk sii kha an thuh chap. A rak chuakmi chemical thil cu rili ti he aa ton tikah a bang i a kham, mah cu tilawng a pum ah sii thuh chapmi bantuk a si. A hnuah lehmah 0.03 [0.7 mm] hrawng a chahmi, mah sii thuhmi thap cu a kawk i aa benhmi rili thilnung pawl zong an tla chih. Mah hnuah tilawng pum ah a thar in a thau khammi an hung chuak.

 Science lei thil hneksaknak hmun (laboratory) i an hneksakmi ningin mah thil sining nih tilawng pum ah rili thilnung pawl i benhnak kha a let 100 in a kham khawh. Mah nih tilawng dinhnak ah hmanmi tangka tampi kha a tloter caah tilawng company pawl nih an duh tuk lai.

 Zeitindah na ruah? Pilot huel nga i amah tein thianhhlimh khawhnak a cuar cu amah tein a si kho hnga maw? Asiloah design suaitu pakhatkhat a um hnga maw?