Rili lit timi cu rili tawne i lung a tamnak hmun ah a ummi thilnung a si. An pum cungah a bo tete le a zum tete a ummi a nemmi thilnung an si. An pum cu khuaiseng bantukin an nemter khawh i second tlawmte chungah a hah zong an hahter khawh. Cutin an i thlen khawh caah lung karlak le a kahnak zawn ah an lut kho i dawh khawh an si nakhnga lo an i hahter khawh. Rili lit nih cutin an tuah khawhmi cu an vun ruangah a si.

 Ruathmanh: Rili lit nih an vun kha a hah nakhnga, a zafang a si nakhnga le a nem nakhnga an thlen khawh. Cutin a dotdot tein an thlen lioah an vun ah a ummi an thahri pawl cu an i peh caan a um bantukin an i peh lo caan zong a um. Cutin an tuah lioah a hahter khomi asiloah a nemter khomi protein hna kha an hman.

 A hahtermi protein nih pehnak tissue thahri hna kha a peh tikah a vun cu a hung hak. A nemtermi protein hna nih mah thahri kha a chah tikah a vun cu a hung nem. Rili lit i a vun cu a ti dihmi bantuk a lawh tiang a nem kho.

 Scientists pawl nih rili lit i a vun bantukin thil sining cungah i hngat in aa thleng khomi thilri ser awkah an i zuam. Thilri phunkhat cu thluak khuaihlainak ah an hmanmi battery tunnak lu a si. An chiah duhnak hmun ah a um khawh nakhnga a hah lengah a nem zong a nem khomi battery tunnak lu phun kha a si. A herh ningin thlen khawh a simi battery tunnak lu phun an hman ahcun khuaihlainak ah a hlawh a tling deuh lai.

 Zeitindah na ruah? Rili lit i aa thleidangmi a vun cu amah tein a si kho hnga maw? Asiloah design suaitu pakhatkhat a um hnga maw?