Uico pawl nih rim theih khawhnak kha hmangin a dang uico pawl i an kum, an lungput le a nu maw/ a pa maw an si ti kha an hngalh khawh tiah hlathlaitu pawl nih an ti. Cun a puak khomi thilri le ritnak sii hna zong kha a rim in hngalh awkah cawnpiak khawh an si. Minung nih hmuh khawhnak kha hmangin an pawngkam kha an dothlat, asinain uico nih cun rim theih khawhnak kha hmangin an dothlat.

 Ruathmanh: Uico rim theih khawhnak cu minung nakin a let tampi in a ṭha deuh. U.S. National Institute of Standards and Technology nih uico pawl cu “aa cawhmi thil nuai nuai khat chung i a cheubang pakhat te hmanh kha a rim an theih khawh. Mah cu Olympic ti lionak he aa tiami ti kuang chungah cini darkeu khat i cheuli cheukhat paihmi tluk a si” tiah a ti.

 Uico rim theih khawhnak cu zeicah mah tlukin a ṭhat?

•   Uico hnar cu a cin caah rim theih awkah an i fawih.

•   An hnar ah thli luhnak a awng pahnih a um. Pakhat in thaw an dawp i pakhat in a rim an hnimh. Uico nih rim a hnimh tikah a rim theih khawhnak aa telmi a hnar chungah thli an lut.

•   Uico rim theih khawhnak nih lehmah 20 (130 centimeter) velchum tiang a rim a theih khawh. Mi pakhat nih cun lehmah 0.8 (5 centimeter) velchum tiang lawng a rim a theih khawh.

•   Uico nih minung nakin a rim theih khawhnak cell a let 50 leng a ngei.

 Cucaah uico nih a rim phun tampi kha an thleidan khawh. Tahchunhnak ah, minung nih tihang a rim kha an theih, asinain uico nih cun tihang chungah aa telmi vialte i a rim kha a thleidan khawh dih.

 Pine Street Foundation i hlathlaitu hna nih uico a thluak le a hnar rian an ṭuanṭi ning cu “vawleicung ah khuaruahhar bik a rim theih khawhnak thilri phunkhat a si” tiah an ti. Scientist pawl nih puahkehnak thilri, phung ning loin zuarmi thilri, cancer zawtnak i telin zawtnak hna kha a rim in a thei khomi electronic “hnar pawl” an ser.

 Zeitindah na ruah? Uico rim theih khawhnak cu amah tein a si kho hnga maw? Asiloah design suaitu pakhatkhat a um hnga maw?