MINO PAWL BIAHALNAK
Baibal Nih Zeitindah A Ka Bawmh Khawh?—Ṭhen 1: Ṭha Tein Baibal Hlathlainak
“Baibal rel awkah fakpi in kaa zuam ko nain a tam tuk caah ṭihnak ka hun ngei!”—Briana, 15.
Nangtah cutin na ruat bal maw? Mah capar nih aan bawmh khawh!
Zeicah Baibal ka rel awk a si?
Baibal rel cu mi a nor tiah na ruat maw? Na ruah ahcun kan hngalhthiam ko. Baibal cu cahmai thong tampi a si lengah cafang zong a fate, cun hmanthlak zong a um lo. TV le video bantukin lungthawh awk a um lo tiah na ruah men lai!
Mah hi ruat hmanh: Lungvar chiahnak kuang hlunpi pakhat na hmuh hei ti u sih. Mah tikah a chungah zeidah a um ti kha hngalh na duh lai a si ko lo maw?
Baibal cu mah lungvar chiahnak kuang he aa lo. Baibal ah lungvar he aa lomi mifim bia tampi aa tel, mah nih
A ṭhami biakhiahnak tuah khawh awk
Nulepa he rem tein um khawh awk
Hawikom ṭha hmuh khawh awk
Lungretheihnak tawnghtham khawh awkah a kan bawmh.
Mah hlanlio cauk cu tuchan zongah zeicah hman awk a tlak rih? Zeicahtiah, “Cathiang hi a dihlak in Pathian thaw chuah hnawhmi a si.” (2 Timote 3:16) Cucaah Baibal ruahnak cheuhnak cu a ṭha bikmi Ruahnak Cheutu sinin a ra tinak a si.
Zeitindah ka rel awk a si?
A pakhatnak lam cu Baibal kha a hramthawk in a dongh tiang rel. Mah nih Baibal ah aa telmi thawngpang kha a huap in aan hngalhter lai. Baibal rel ning lam tampi lakin pahnih hi zohhmanh:
Baibal cauk 66 kha Genesis in Biathlam tiang aa changchang in na rel khawh.
Baibal ah aa telmi thil sining hna i an kum ningin na rel khawh.
Ruahnak cheuhnak: Baibal Hlathlainak Ca Lamhruainak cauk chung i “Jesuh Vawleicung a Nun lio i a Cangmi a Biapimi Thil Hna” timi tangah Jesuh vawleicung nunnak kong kha cazin in a langhter.
A pahnihnak lam cu na tonmi zuamcawhnak he aa pehtlaimi tuanbia pakhat kha thim law rel. Tahchunhnak ah:
Zumhawk a tlakmi hawikom ngeih na duh maw? Jonathan le David kong tuanbia kha rel. (1 Samuel, dal 18-20) Cun zulh awk a tlakmi kong hna cawn khawh awkah “Zumhawk Tlakmi Hawikom Kawl Khawh Ning” timi cazin kha hmang.
Lemsoinak tei khawh awkah fakpi in i zuam na duh maw? Josef nih lemsoinak a tei khawh ning kha rel. (Genesis, dal 39) Cun zulh awk a tlakmi kong hna cawn khawh awkah “Lemsoinak Tei Khawh Ning . . . Josef—Ṭhen 1” le “A Hmaan Loin Sualpuhnak . . . Josef—Ṭhen 2” timi cazin kha hmang.
Thlacamnak nih aan bawmh khawh ning kha hngalh na duh maw? Nehemiah kong kha rel. (Nehemiah, dal 2) Cun zulh awk a tlakmi kong hna cawn khawh awkah “Pathian Nih A Thlacamnak A Leh” timi cazin kha hmang.
Ruahnak cheuhnak: Baibal na rel tikah ṭha tein lungthin na pek khawh nakhnga a daimi pawngkam ah rel i zuam.
A pathumnak lam cu Baibal tuanbia pakhat asiloah salm nambar pakhat kha thim law rel, cun nangmah he aa pehtlaih ning kha ruat. Na rel dih in hitin naa hal kho:
Jehovah nih mah kong hi Baibal ah zeicah a telh?
Mah nih Jehovah sining asiloah a thil tuah ning kong zeidah a langhter?
Ka nunnak ah zeitindah ka hman khawh?
Ruahnak cheuhnak: Hmuitinh chia! Baibal relnak program na thawk caan, nithla kha i ṭial.