MINO PAWL BIAHALNAK
Ka Thil hruk-aih Ning Cu Zeidah A Lawh?
Naa hruk-aih ning kha zeicah biapi ah na chiah awk a si? A ruang cu kan thil hruk ning nih zei bantuk minung dah kan si ti kha a langhter caah a si. Na thil hruk ning nih na kong zeidah a langhter?
Hruk-aih ning (fashion) he aa tlaiin a hmaan lomi hmuhnak pathum le hrial khawh ning
A hmaan lomi #1: Media hna ah langhtermi hruk-aih ning bantukin naa hruk ve awk a si.
Kumhra fai a simi Theresa nih hitin a chim: “Hmanung bik chuak hni-puan faakthanh hna kha ka hmuh lengmang caah mah kha hruk ka hun duh ve. Mi tampi nih hni-puan design phunkhat an i hrukmi kha atu le atu ka hmuh caah anmah bantukin i hruk ve loin um cu a har tuk.”
Faakthanh cu nu pawl cung lawngah huham a ngeihmi a si lo. “Pa pawl cung zongah hmanung bik chuakmi fenh-aih ning cu huham a ngei. A ngakchia rihmi pa pawl hmanh kha chawlettu hna nih an ngaan hna lo” tiah The Everything Guide to Raising Adolescent Boys timi cauk nih a ti.
Hrial khawh ning: Baibal nih hitin a ti: “Mi lungthin tlawm nih cun zei paoh kha a zumh, sihmanhsehlaw mifim nih cun a lamh ding kha ṭha tein a zoh.” (Phungthlukbia 14:15) Mah Baibal phunglam ningin faakthanh ah na hmuhmi kha zum colh hlah, ṭha tein dothlat hmasa. Tahchunhnak ah, “sassy,” “hot” asiloah “sexy” a simi thil puan hna faakthanh ah na hmuh ahcun hitin i hal:
‘Mah thil hi ka cawk ahcun ahodah a miak a hmu lai?’
‘Mah hi kaa hruk ahcun zei bantuk minung dah ka lawh lai?’
‘Mah nih ka sining taktak le ka dirhmun kha a langhter maw?’
Hruk-aih ning ca lamhruainak: Thil puan faakthanh le hruk-aih ning kong a langhtermi a dang media hna kha zarhkhat chung ṭha tein dothlat. Zei bantuk thil puan dah an hlorh? Chan tiluan ningin i hruk-aih ve a hau timi ruahnak aan ngeihter maw? Kumhra fai a simi Karen nih hitin a ti: “Dawh tein i hruk-aih awk le pumrua dawhnak a langmi thil hna i hruk awkah mino pawl cu an i zuam. Mah kha a hngalmi hna nih mino pawl kha hmuichon ah chia in faakthanh an tuah.”
A hmaan lomi #2: Hawi he i lawh awkah hmanung bik chuak thil kha kan i hruk awk a si.
Kumhra fai a simi Manuel nih hitin a ti: “A laarmi thil kha mikip nih an i hruk. Mah kha naa hruk ve lo ahcun na kong an in ceih lai.” Kumhra fai a simi Anna zong nih hitin a ti: “Hmanung bik chuak hruk-aih ningin an i hrukmi cu dawh an duh ca lawngah a si lo, a bik in cun hawi he i lawh an duh caah a si.”
Hrial khawh ning: Baibal nih hitin a ti: “Hi vawlei kalning hin kal ve lengmang ti hlah u.” (Rom 12:2) Mah ruahnak cheuhnak ningin na thil hruk-aih ning kha i dothlat law hitin i hal:
‘Thil hruk-aih ning kaa thimmi cu zei a kong hna cungah dah aa hngat?’
‘A min a thangmi thil ṭazeih hna kha ka duh maw?’
‘Ka thil hruk-aih ningin midang lungthin lak awkah kaa zuam maw?’
Hruk-aih ning ca lamhruainak: Chan thar hnipuan maw a si, chan nih a kaltakmi dah a si ti lawng kha ruat hlah. Mah hi kaa hruk ahcun mahle mah zumhnak le ka him timi ruahnak a ka ngeihter maw ti zong ruat. Mahle mah i zumhnak na hun ngeih deuh ahcun hawi he i lawh lo ding kha na ṭih ti lai lo.
A hmaan lomi #3: Ṭha tein a khup dih lomi thil nih mi lungthin a lak.
Jennifer timi mino nute nih hitin a ti: “Hmaan tein chim ahcun a tawi i aa tet tukmi le ṭha tein a khup dih lomi thil hna kha a caan ah hruk ka duh ve.”
Hrial khawh ning: Baibal nih hitin a ti: “Nan thil, nan thuam te hna ah khan nan i dawhnak cu a um awk a si lo, nan i dawhnak cu nan chung muru ah a um awk tu a si.” (1 Peter 3:3, 4) Mah ruahnak cheuhnak ningin mi lungthin a la deuhmi cu lenglei dawhnak maw, chunglei dawhnak dah ti kha ruat.
Hruk-aih ning ca lamhruainak: A ṭha bikmi fenh-aih ning cu upat awk a tlakmi kha a si. Mah cu tuchan ah a laarmi a si lo ti cu a hmaan ko. Asinain mah tahchunhnak hi ruathmanh:
A zungzal in amah kong lawng a chim pengmi pakhat he bia nan i ruah bal maw? Mah cu nangmah aan ṭhawlmi bantuk a si i a hnuah amah he bia i ruah kha na duh ti lai lo ti cu a fiang ko!
Biaruahnak bantukin naa thimmi hnipuan nih mahle mah biapi tuk ah aa chiami aan lawhter khawh i na pawngah a ummi pawl na ṭhawl hna bantuk a siter khawh
Upat awk tlak loin naa hruk-aih ahcun cu bantuk mi he naa lo lai. Naa hruk-aih ning nih “rak ka zoh u” tiah a timi bantuk a siter lai. Mah nih a him lomi aan siter khawh asiloah mahle mah biapi tuk ah aa chiami aan lawhter khawh. A ṭha lomi lungthin peknak i telin zei bantuk lungthin peknak paoh hmuh a duh tukmi aan lawhter khawh.
Na zuar lomi thil kha faakthanh tuah loin upat awk a tlakmi si dingin i zuam. “Upat awk a tlakmi ti tikah na pi nih aa hruk-aih bantukin i hruk ve kha a chim duhmi a si lo. Nangmahle nangmah, cun na pawngkam mi pawl na upatmi hna kha a chim duhmi a si” tiah kumhra fai a simi Monica nih a chim.
Mah Kong Hna Zong Hi Na Duh Khawh Men
ṬHIRUAL PAWL CHIMMI
Muisam Kong He Aa Tlaiin Ṭhirual Pawl Nih An Chimmi
Mino caah muisam kong he aa tlaiin a tlarimi hmuhnak ngeih peng cu zeicah zawmcawhnak a si khawh? Zeinihdah a bawmh khawh hna?
