Jehovah nih “a dingmi thil a tuahtu paoh cu thil ṭha kha pe loin a um hna lo” tiah Baibal nih a ti. (Salm 84:11) ‘A dingmi thil tuah’ timi cu zei sullam dah a si? Pumpeknak na tuah lio i Jehovah sinah bia naa kammi ningin nun peng kha a chim duhmi a si. (Phungchimtu 5:4, 5) Tipil na in hnuah zeitindah a dingmi thil kha na tuah peng khawh?

Hi capar ah

•  Harnak lakah inkhawhnak ngei peng

•  Lemsoinak kha do peng

•  Lungthawhnak ngei peng

 A biapimi Baibal caang: “Pathian Pennak chung luh awkah hin harnak tampi kan ton a hau.”—Lamkaltu 14:22.

 A sullam: Khrihfa dihlak cu an nunnak ah harnak an tong ko lai. Khrihfa na si caah nihsawhnak asiloah ralchanhnak hna na tong kho. Tangkalei harnak asiloah zawtnak ti bantuk cu mikip nih kan ton.

 I ruahchanh dingmi: A caan ah na sining cu aa thleng kho i na duh lomi thil hna na tong kho. Baibal nih Khrihfa kan si zong, si lo zongah mikip nih thil ṭhalo kan tong kho tiah a ti.—Phungchimtu 9:11.

 Na tuah khawhmi: Harnak hna ka tong lai ti kha na hngalh caah inkhawh awkah a hlankan in naa timhtuah chung kho. Harnak hna kha zumhnak fehternak le Jehovah i bochan deuhnak caanṭha in hmu. (Jeim 1:2, 3) Nikhatkhat ah lamkaltu Paul bantukin pumpak kan hmuhtonnak in hitin kan chim khawh ve lai: “Ṭhawnnak a ka pekmi thawngin zei thil hmanh hung chuak hna sehlaw ka ton khawh ko hna.”—Filipi 4:13.

 Ruahnak cheuhnak: Josef kong kha hlathlai. A kong kha Genesis dal 37 le 39 in 41 tiang na rel tikah mah hi ruat: Josef nih zei aa ruahchan lomi thil dah a ton i zeitindah a tawnghtham? Jehovah nih Josef kha zeitindah a rak bawmh?

 A dang bawmhnak

•   Rel:

   “Thil Ṭhalo Tonnak Kha Zeitindah Ka Tawnghtham Khawh?”

   “Zeitluk In Dah Ka Lung A Ṭhawn?”

   “Thil Sining Thlennak Tawnghtham Ning”

•   Download tuah:

   “Nulepa An Zawt Tikah”

 A biapimi Baibal caang: “Mi nih tukforhnak kan in cu kan duhnak a ṭhalomi nih khan a kan pialpi i rap ah a kan foih caah a si tawn.”—Jeim 1:14.

 A sullam: A caan ah kan dihlak in kan duhnak nih a kan lemsoi tawn. Mah kha kan al khawh lo ahcun palhnak kan tuah kho.

 I ruahchanh dingmi: Tipil in hnu zongah “pumsa duhnak” lungput kha kan ngei kho rih. (2 Peter 2:18) Ṭhitumnak tuah hlanah nupa sualnak tuah dingin lem ka si tiah na ruah khawh men.

 Na tuah khawhmi: Sualnak tuah dingin lemsoinak na ton hlan atu in biakhiahnak tuah. Jesuh nih “ahohmanh bawi pahnih sal nan si kho lai lo” tiah a timi kha i cinken. (Matthai 6:24) Ahodah na bawi a si lai ti kha nangmah tein naa thim a hau. Jehovah kha i thim hna u sih. A ṭhalomi duhnak cu zeitluk in a ṭhawn hmanhah lemsoinak ningin tuah lo awkah naa thim khawh.—Galati 5:16.

 Ruahnak cheuhnak: Na ṭhatnak he, na derthawmnak he hngalh awkah i zuam. Na ngeihmi sining ṭha a ṭhancho nakhnga aan bawm khomi hawikom kha i thim hna. Thil ṭha tuah awkah tha an pe lomi minung, hmun le thil sining hna kha hrial.—Salm 26:4, 5.

 A dang bawmhnak

•   Rel:

   “Lemsoinak Hna Kha Zeitindah Ka Tei Khawh?”

   “Nupa Sualnak Kong Ruah Lo Awkah Zeitindah Ka Tuah Khawh?”

   “Ṭhirual Hneknak Doh Khawh Ning”

   “Jehovah Ruahnak Kha Na Ruahnak Na Siter ve maw?”

 A biapimi Baibal caang: “Bawmh duhnak lungthin nan ngeih tawnmi kha a dongh tiangin ngei cio ko u . . . Mi thathu si awk kha kan in duh hna lo.”—Hebru 6:11, 12.

 A sullam: A rian ṭha tein lungthin a pe lomi cu a daithlang lai i a tha zong a hun thu kho.

 I ruahchanh dingmi: Tipil na in hnuah na lung a cawlcang tuk i na lung zong a tho tuk men lai. Jehovah zong na dawt tuk ko lai. Asinain tlawmpal a rauh ah Jehovah nawlngaih kha a hlan nakin naa hun i harh khawh i na lung hmanh a dong kho, cun na lungthawhnak zong a zor kho.—Galati 5:7.

 Na tuah khawhmi: Tuah duhnak lungput na ngeih lo hmanhah a hmaanmi thil kha tuah peng. (1 Korin 9:27) Cun vancung na Pa he i naih deuh awk le a kong kha ṭha deuh in hngalh awkah i zuam. Atu le atu thlacam. Mah lengah Jehovah rian lunglawm tein a ṭuanmi hna he i hawikomh awk zongah i zuam.

 Ruahnak cheuhnak: Jehovah nih aan dawt tuk i nangmah bawmh awkah timhcia a si ti kha philhhlah. Chikkhat na lungthawhnak a zor ruangah Jehovah cu ka cungah a lung a dong tiah ruat hlah. Baibal nih “a dermi le a bami kha thazaang a pek hna” tiah a ti. (Isaiah 40:29) A caan a phanh tikah lungthawhnak ngeih ṭhan dingin naa zuammi cungah thluachuah aan pek lai.

 A dang bawmhnak

•   Rel:

   Mino Hna—‘Nan Khamhnak a Tlin Khawh nakhnga Ṭuan Ko U’

   “Pathian Biaknak Ah Kaa Nuamh Nakhnga Zeitindah Ka Tuah Khawh?”

•   Zoh:

   Ṭhirual Nih An Chimmi—A Ṭha Bikmi Nunnak

 A biapi bikmi: Zumhfek tein na um peng ahcun Jehovah lung na lawmhter lai! (Phungthlukbia 27:11) Amahlei ṭan dingin naa thim ahcun aa lawm tuk lai i Satan dohnak al khawh awkah na herhmi vialte kha aan pek lai.