America ah thlacamnak kong he aa tlaiin kumhra fai mino zatuak 80 kha cazin an lak hna i mah lakah a cheu nih nifate thla kan cam tiah an ti. Mi cheukhat nih thlacamnak he aa tlaiin hitin an ruah: ‘Thlacamnak cu lungthin a daihtertu asiloah thil sining a ṭhatter deuhtu a si.’

•  Thlacamnak cu zeidah a si?

•  Pathian nih a ngai maw?

•  Zei kong dah thla kan cam khawh?

•  Ṭhirual chimmi

 Thlacamnak cu zeizong vialte a Sertu he i pehtlaih khawhnak lam a si. Mah nih zeidah a chim duhmi a si ti kha ruat. Jehovah cu minung nakin a lam kip in a sang deuh i “aho kan sin hmanh hin aa hlat lo.” (Lamkaltu 17:27) A tak ti ahcun Baibal ah mah a ṭha tukmi sawmnak hi aa tel: “Pathian cu naih u law aan naih ve hna lai.”​—Jeim 4:8.

 Pathian cu zeitindah na naih khawh?

•   Lamkhat cu thlacamnak thawngin a si​—mah cu Pathian sinah bia na chimmi a si.

•   A dang lam pakhat cu Baibal hlathlainak thawngin a si​—mah cu Pathian nih bia aan ruahmi a si.

 Thlacamnak le Baibal hlathlainak in pakhat le pakhat nan i pehtlaihnak nih Pathian he nan i hawikomhnak kha a fehter lai.

 “Lianngan Bik Jehovah sinah biachimnak le pehtlaihnak cu minung nih kan hmuh khawhmi tinvo lakah a ṭha bikmi pakhat a si.”​—Jeremy.

 “Thlacamnak in ka intuarnak kong Jehovah sin ka phuan tikah amah he kan i naih deuh tiah ka ruah.”​—Miranda.

 Pathian cu na zumh i a sinah thla na cam bu hmanhin thlacamnak a ngaih taktak ti cohlan awkah naa harh ko lai. Asinain Baibal nih Jehovah cu “thlacamnak a kan lettu” tiah a auh. (Salm 65:1) ‘Na lungretheihnak vialte kha amah cungah chiah dingin’ aan sawm. Zeicah? ‘Amah nih aan zohkhenh caah’ a si.​—1 Peter 5:7.

 Ruah dingmi a kong: Na hawile he atu le atu bia ruah awkah a caan na pe maw? Pathian ca zongah cutin na tuah khawh. Jehovah timi a min kha hmangin hmaan tein a sinah thla cam. (Salm 86:​5-7; 88:9) Baibal nih “a zungzal in thla cam u” tiah a ti.​—1 Thesalon 5:​17.

 “Thlacamnak cu vancung ka Pa le keimah bia kan i ruahnak a si i ka lungchung ummi vialte kha ka phuan.”​—Moises.

 “Ka nu asiloah ka hawikom ṭha sinah bia ka chim bantukin Jehovah sinah ka lungchung ummi vialte kha ka chim.”​—Karen.

 Baibal nih hitin a ti: “Thla nan camnak ah Bawipa cu nan herhmi kha hal u law nan hal tikah lunglawm tein hal zungzal u.”​—Filipi 4:6.

 Mah cu na harnak kong cam cu a poi lo tinak a si maw? A si! Baibal nih hitin a ti: “Na thilrit cu BAWIPA sinah ṭhum ta law amah nih aan bawmh lai.”​—Salm 55:22.

 Pathian sin thla na cam tikah na harnak kong lawng na chim awk a si lo. Chantelle timi mino nu pakhat nih hitin a ti: “Jehovah sinah bawmhnak lawng ka hal ahcun amah he hawikom ṭha kan si kho lai lo. A hmasa ah lawmhnak bia ka chim awk a si tiah ka ruah, i lawmh awk a ruang tampi ka ngei.”

 Ruah dingmi a kong: Na nunnak ah lunglawmh awk zei a ruang hna dah na ngeih? Atu ni caah Jehovah cung naa lawmhnak a ruang pathum kha na ruat kho maw?

 “Thil sawhsawh a simi aa dawh tukmi pangpar pakhat ti bantuk caah Jehovah cungah kan i lawm kho.”​—Anita.

 “Na lungthin aan lami sermi thil pakhat asiloah na lung aan sumi Baibal caang pakhat kha ruat law Jehovah sinah lawmhnak bia chim.”​—Brian.