Kan zumh. Jehovah Tehte Hna nih Baibal hi a dihlak in “Pathian thawchuah hnawhmi a si i a ṭhahnemmi a si” tiah kan zumh. (2 Timote 3:16) Mah ah Biakam Hlun he Biakam Thar he aa tel. Jehovah Tehte Hna nih mah kha Hebru Baibal le Khrihfa Greek Baibal tiah kan auh hna. Cuticun Baibal cheukhat cu chan he aa tlak ti lomi asiloah hman awk a tlak ti lomi a si timi ruahnak mi ngeihter kha kan hrial.

Thiang thlarau lamhruainak thawngin Khrihfa lamkaltu Paul nih hitin a ṭial: “Cathiang chung i aa ṭialmi vialte cu kanmah cawnpiaknak caah a si.” (Rom 15:4) Cucaah Hebru Baibal ah kan caah man a ngeimi lamhruainak a um. Mah lakah man a ngeimi tuanbia le zulh awk a tlakmi ruahnak cheuhnak aa tel.

• Man a ngeimi tuanbia. Hebru Baibal ah sernak kong le minung nih sualnak an rak tuahnak kong a dikthliar in aa ṭial. Mah kong kan hngalh lo ahcun hi bantuk biahalnak a phi hi lungtling tein kan hmu kho lai lo: Khoika in dah kan rat? Zeicah kan thih? (Genesis 2:7, 17) Mah lengah Hebru Baibal ah kanmah bantukin lunglawmhnak le harnak a tongmi hna, Jehovah nih a pehtlaih hnaning kong zong aa ṭial.​—Jeim 5:17.

• Zulh awk a tlakmi ruahnak cheuhnak. Hebru Baibal chungah aa telmi Phungthlukbia le Phungchimtu cauk chungah zeitik caan paohah hman khawhmi fimnak kong aa ṭial. Mah ah a nuammi innchungkhar zeitindah si khawh a si (Phungthlukbia 15:17), rian he aa tlaiin zeitindah a tlarimi hmuhnak ngeih khawh a si (Phungthlukbia 10:4; Phungchimtu 4:6) ti le mino pawl nih an no lio caan kha zeitindah a ṭha bik in an hman khawh (Phungchimtu 11:9–12:1) timi ruahnak cheuhnak kong aa ṭial.

Mah lengah Torah (Genesis in Deuteronomi tiang) chungah aa ṭialmi Moses Nawlbia hlathlainak thawng zongin ṭhathnemnak kan hmu kho. Khrihfa pawl cu mah Nawlbia tangah kan um ti lo nain mah ah a nuammi nunnak a kan ngeihter khomi man a ngeimi phunglam aa ṭial.​—Levitikas 19:18; Deuteronomi 6:5-7.