Jehovah Tehte Hna nih Mi pakhatkhat Bu chung in An Chuah hna maw?
Jehovah Tehte pakhat in tipil a rak ing nain phung a chim ti lomi, zumtu khat pawl he duhsah in aa kom ti lomi cu bu chung in chuahmi an si lo. A tak ti ahcun a thlaraumi an si ṭhan nakhnga tu fakpi in kan bawmh hna.
Sualnak ngan a tuahmi kha bu chung in kan chuah colh hna lo. Asinain tipil a ing cangmi Jehovah Tehte pakhat nih Baibal i ziazalei he aa tlaimi phunglam a buar lengmang i aa ngaihchih lo ahcun bu chung in chuah a si lai. Baibal nih “nan bu chungin miṭhalo kha va chuah u
” tiah fiang tein a chim.—1 Korin 5:13.
Pa pakhat cu bu chung in chuah a si nain a nupi le a fale cu Jehovah Tehte an si ah tah zeitin? A chungkhar he biaknaklei he aa tlaimi thil a tuah kho ti lo nain an thi cu aa tlai rih ko. Cucaah chungkhar pehtlaihnak le biakchawnhnak cu a um rih ko lai.
Bu chung in chuahmi cu aa pum kho ko. A duh ahcun Khrihfa upa sinin thlaraulei cawnpiaknak hmuh awkah bawmhnak a hal khawh hna. Tinhmi cu Jehovah Tehte pakhat in sining a tlinh ṭhan nakhnga bawmh kha a si. A ṭhalomi ziaza a hlaw i Baibal phunglam ning in nun a duh taktak a langhtermi hna cu bu chungmi si ṭhan awkah kan cohlan zungzal ko hna.