Jehovah Tehte Hna Nih Zeicah Chuah Ni Puai An Tuah Lo?
Jehovah Tehte Hna nih chuah ni puai tuah cu Pathian nih a duh lo tiah an ruah caah an tuah lonak a si. Baibal ah chuah ni puai tuah hlah u tiah fiang tein cun a chim lo. Asinain chuah ni puai tuahnak a ruang hna kha tuaktan khawh awk le Pathian hmuh ning kha hngalhthiam khawh awkah Baibal nih a kan bawmh. Chuah ni puai tuah a sinak a ruang pali le mah he aa tlaimi Baibal lamhruainak kha zoh hna hmanh u sih.
Chuah ni puai cu a hmaanmi Khrihfa biaknak in hram aa thawkmi a si lo. Mi pakhat a chuah ni ah, “khuachia hna nih harnak an pek khawh. Chuah ni puai ah hawile i thlacampiaknak nih chuah ni a tuahtu kha harnak in a huhphenh khawh” timi zumhnak ruangah chuah ni puai an tuahnak a si tiah (Funk & Wagnalls Standard Dictionary of Folklore, Mythology, and Legend) timi cauk ah a langhter. Hlanlio i chuah ni cazin hna cu, “hngalh awkah a harmi arfi zohthiamnak cungah aa hngat i hmailei sining kong zohchungnak caah a biapi tukmi a si. Phungphai ningin chuah ni puai ah vanmi phazawngdaing hna nih thlacampiaknak kha khuaruahhar lam in a tlinter” tiah (The Lore of Birthdays) timi cauk zongah a langhter.
Asinain mitleh, bedin le khuachia thiamnak tibantuk hna tuah kha Baibal nih a duh lo. (Deuteronomi 18:14; Galati 5:19-21) Hlanlio Babilon mi hna Pathian nih dan a tat hnanak a ruang pakhat cu bedin phunkhat a simi arfi zohthiamnak kha an rak tuah caah a si. (Isaiah 47:11-15) Jehovah Tehte Hna nih phungphai kip i a hrampi kha a caanpe in an zul lo. Baibal ah aa telmi mah bantuk a fiangmi lamhruainak hna lawng kha an zulh.
Hmasa Khrihfa hna nih chuah ni puai an tuah lo. “Chuah ni puai tuah cu a hmaanmi Khrihfa hna i phungphai a si lo tiin hmasa Khrihfa hna nih an zumh” tiah (The World Book Encyclopedia) timi cauk ah a langhter. Jesuh cawnpiaknak dairek in a hmumi lamkaltu hna le zultu dang hna nih tuchan a hmaanmi Khrihfa dihlak nih zulh awk a simi zohchunh awk hna an chiah tiah Baibal ah a langhter.—2 Thesalon 3:6.
A hmaanmi Khrihfa hna nih pakhat lawnglawng an tuahmi puai cu Jesuh a thih philhlonak puai a si i a chuah ni puai a si lo. (Luka 22:17-20) Jesuh a thih philhlonak puai tuah cu khuaruahhar awk a si lo. Zeicatiah “thih ni hi hrin ni nakin a ṭha deuh” tiah Baibal ah a langhter. (Phungchimtu 7:1) Jesuh cu a thih lioah Pathian hmaiah min ṭha a hmu. Cucaah Jesuh a chuah ni nakin a thih ni cu a biapi deuh.—Hebru 1:4.
Jehovah Pathian a biami pakhat i a chuah ni puai kong kha Baibal ah a um lo. Baibal ah chuah ni puai kong ṭial an philh caah maw a si? A si lo. Zeicatiah Pathian a bia lomi pahnih i an chuah ni puai kong kha a langhter. Asinain mah chuah ni puai ah a pahnih ningin a ṭha lomi thil a rak cang.—Genesis 40:20-22; Marka 6:21-29.
Jehovah Tehte Hna i an fale hna nih chuah ni puai an tuah lo caah pakhatkhat kan sung tiah an ruat maw?
Dawtnak a ngeimi nulepa hna bantukin Jehovah Tehte nulepa hna zong nih an fale an dawt hna kha an bia le an tuahsernak in an langhter zungzal. Cucaah laksawng an cawkpiak hna. A nuammi hawikomhnak an tuahpi hna. Minung nih kan herhmi hna lungtho tein a kan tuahpiaktu Pathian kha i zohchunh awkah Jehovah Tehte Hna nih an i zuam. (Matthai 7:11) Cucaah Jehovah Tehte Hna i an fale nih pakhatkhat kan sung tiah an ruah lo kha mah a kong hna in theih khawh a si:
“Kaa ruahchan lo lio caan ah laksawng pakhat ka hmuh tikah kaa nuam tuk.”—Kum 12 a simi, Tammy.
“Ka nu le ka pa nih ka chuah ni caah tiin laksawng a kan cawkpiak lo. Kaa ruahchan lo lio caan ah laksawng ka hmuhmi kha ka duh.”—Kum 11 a simi, Gregory.
“Changreu tlawmpal he hla fungkhat sak in minit pahra hrawng hawikomhnak nan tuah kho lai maw? A nuam taktakmi hawikomhnak kha hngalh khawh awkah kan inn ah rak kan leng u!”—Kum 6 a simi, Eric.