Jehovah Tehte Hna cu anmah theng le midang hna i an chungkhar kha dirh awkah an i zuam. Pathian kha chungkhar hram a thawktu in kan upat. (Genesis 2:​21-​24; Efesa 3:​14, 15) Baibal ah aa telmi Pathian lamhruainak hna nih vawleicung pumpi ah a ummi nuva hna kha chungkhar dawtnak hri feh awk le i nuamh awkah a bawmh hna.

Baibal lamhruainak hna nih va ṭha, nupi ṭha le nulepa ṭha si awkah a kan bawmh caah mah lamhruainak hna kha kan si khawh chungin kan zulh. (Phungthlukbia 31:10-​31; Efesa 5:⁠22–​6:4; 1 Timote 5:8) Baibal lamhruainak hna kha kan zulh ahcun kan innchung hawi cu Jehovah Tehte a si lo hmanhah chungkhar nunnak ah nuamhnak hmuh khawh a si ko. (1 Piter 3:​1, 2) Jehovah Tehte a si lomi innchung hawi hna nih an chimmi hi zohhmanh:

• “Kan i umh in kum 6 chung cu i siiknak le thinhunnak in caan a dih. Ka nupi Ivete cu Jehovah Tehte a hun si tikah dawtnak a ngei deuh i a lung zong a sau deuh. Aa thlennak nih kan innchungkhar kha a hun nuamhter.”​—Brazil ram i Clauir.

• “Ka vapa Chansa nih Jehovah Tehte Hna he Baibal a cawn tikah ka ralchanh colh. Zeicatiah chungkhar a ṭhencheutertu an si tiah ka rak ruah caah a si. A taktak ti ah cun Baibal nih kan chungkhar dawtnak hri feh awkah a kan bawmh ti kha mah caan thawk in kan hun hngalhthiam.”​—Zambia ram i Agness.

Baibal lamhruainak hna zulhnak nih a tanglei kong hna hi tonghtham khawh awkah a kan bawmh ti kha mi pawl an chimh hna

• Innchung hawi kha fim tein i thimnak

• I umh hnu kum khatnak kha hlawhtling tein umṭi khawhnak

• Kap hnih chungkhar hna he i pehtlaihnak

• Tangka hmannak

• Nuva karlak ah remnak um khawhnak

• Zeitindah i ngaihthiam ding a si ti hngalhnak

• Ngakchia cawnpiaknak

A caancaan ah cun buaibainak a chuak tawn ko. Tahchunhnak ah, 1998, Sofres company i report ningin cun chungkhar 20 ah 1 cu innchung hawi pakhat Jehovah Tehte a si caah buaibainak nganpi an tong ti kha kan hngalh.

Baibal cawnpiakmi ningin a zulmi hna cu a caancaan ah chungkhar ah buaibainak an tong lai tiah Jesuh nih a chimchung. (Matthai 10:32-​36) Rom Empire chanah “Khrihfa hna cu chungkhar a ṭhencheutertu an si tiin sual an puh hna” a tiah Tuanbialei Mifim Will Durant nih a ti. Tuchan zongah Jehovah Tehte cheukhat cu cutin sualpuh an si ve. Cutin sual an puh hna ruangah Jehovah Tehte Hna cu chungkhar a ṭhencheutertu an si maw?

Jehovah Tehte Hna cu chungkhar a ṭhencheutertu an si timi sualpuhnak kha biachahnak an tuah tikah Minung Zalonnak Kong Europe Biaceihnak Zung nih hitin a ti: “Jehovah Tehte a simi chungkhar pakhat i biaknaklei zalonnak le a zumhnak kha chungkhar dang hna nih cohlannak le upatnak an ngeih lo caah buaibainak a chuahmi a si.” Cun hitin a ti chap: “Jehovah Tehte an si ruangah mah bantuk buaibainak a chuahmi a si lo. Mah bantuk hi cu biaknak aa dangmi chungkhar hna zongah a chuak ko.” b Jehovah Tehte Hna cu biaknak kong he aa tlaiin buaibainak an ton tikah mah Baibal lamhruainak hi an si khawh chungin zulh an i zuam: “Mi nih nan cungah ṭhat lonak an tuah ahcun ṭhat lonak in va lehrul hna hlah u. . . . Mi vialte he i rem awk kha nan i zuam khawh chungin i zuam u.”​—Rom 12:17, 18.

“Khrihfa ṭhitumnak” in i ṭhium u timi Baibal lamhruainak kha Jehovah Tehte Hna nih an zulh caah biaknak aa khatmi he lawng an i ṭhium. (1 Korin 7:​39) Mah halnak cu Baibal chimmi he aa tlak lengah zulhawk zong a tlakmi a si. Tahchunhnak ah, 2010 chuah (Journal of Marriage and Family) timi capar ah “biaknak aa khatmi nuva hna cu Pathian lei he aa tlaimi rian hna kha hmunkhat ah an ṭuanṭi i biaknaklei an zumhnak kong hna kha an i chimh khawh caah” an chungkhar dawtnak hri cu a fek chin tiah a ti. c

Asinain Jehovah Tehte Hna nih an bu chungmi hna kha Jehovah Tehte a si lomi innchung hawi he i ṭhen dingin tha an pe hna lo. Baibal nih hitin a chim: “Khrihfa mi pa pakhatkhat nih a zummi a si lomi nupi a ngeih i a nupi nih umṭi kha a lung a si ko ahcun, ma hlah seh. Cun Khrihfa nu pakhatkhat nih a zummi a si lomi va a ngeih i a va nih cun umṭi kha a lung a si ko ahcun, kir tak hlah seh.” (1 Korin 7:​12, 13) Jehovah Tehte Hna nih mah Baibal lamhruainak kha an zulh.