Jehovah Tehte Hna i chanthar bupi cu kumzabu 19 a donghnak lei in aa thawk. Mah lio ah American ram, Pennsylvania peng, Pittsburgh pawng ah a ummi Baibal siangngakchia phu hmete nih Baibal kha ningcang tein hlathlai hram an rak thawk. Annih nih church cawnpiaknak le Baibal cawnpiakmi taktak kha an tahchunh. Cun an hngalhmi kha cauk, thanhca le atu ah Vennak Innsang​—⁠Jehovah Pennak Thanhnak tiah auhmi journal ah an ṭial i an chuah.

Lungthin ṭha a ngeimi Baibal siangngakchia hna lakah pakhat cu Charles Taze Russell a si. Mah lio caan ah Russell cu Baibal cawnpiaknak rian a hruaitu a si leng ah Vennak Innsang i a hmasa bik editor a si ko nain biaknak thar a dirhtu cu a si lo. Russell le a dang Baibal Siangngakchia pawl an i tinhnak cu Jesuh Khrih cawnpiaknak hlorh le kumzabu pakhatnak lio Khrihfabu nih an tuahmi tuah ve kha a si. Jesuh cu Khrihfa biaknak a dirhtu a si caah Jesuh kha kan bu a dirhtu in kan hmuh.​—⁠Kolose 1:​18-20.