Ruakvuinak he aa tlaiin kan hmuh ning le kan zulhmi phung cu Baibal cawnpiaknak cungah hram aa bunhmi a si, mah ah a tanglei kong hna aa tel:

• Kan dawtmi pakhatkhat an thih tikah kan ngeih a chiatmi cu a phung a si ko. An dawtmi pakhatkhat an thih tikah Jesuh zultu pawl cu an rak ṭap. (Johan 11:33-​35, 38; Lamkaltu 8:2; 9:​39) Cucaah ruakvuinak kha nuamhnak puai bantukin hmuh kan duh lo. (Phungchimtu 3:​1, 4; 7:​1-4) Mah canah zaangfahnak langhter caan in kan hmuh.​—Rom 12:15.

• A thimi nih zeihmanh an hngal ti lo. Kan miphun asiloah nunphung sining kha zeirel loin kan um lo, asinain mithi pawl cu hngalhnak an ngei rih i kan nunnak ah huham an ngei timi Baibal he aa ralkahmi zumhnak cungah hram aa bunhmi tuahsernak kha cu kan hrial. (Phungchimtu 9:​5, 6, 10) Mah tuahsernak ah zan it loin mithi hngah, thih camtuak puai tuah, mithi caah raithawinak tuah, mithi pawl he i chawnhbiak le nuhmei sinak phunglam ti bantuk phungphai hna aa tel. “An sin cun nan i ṭhen hrimhrim lai. A thiang lomi kha zeihmanh tawng hlah u” timi Baibal lamhruainak zulh loin a kan umter khomi phungphai le tuahsernak vialte kha kan hrial.​—2 Korin 6:​17.

• Mithi caah ruahchannak a um. Thawhṭhannak a um lai i thihnak cu a um ti lai lo tiah Baibal nih a kan cawnpiak. (Lamkaltu 24:15; Biathlam 21:4) Mah ruahchannak nih a hleihluat tuk in ngeihchiat lo awkah a kan bawmh. Mah nih a hmasa Khrihfa hna zong kha a rak bawmh hna.​—1 Thesalon 4:​13.

• Baibal nih aa toidormi si awkah ruahnak a kan cheuh. (Phungthlukbia 11:2) Ruakvuinak kha kan ngeihchiah zeitluk dah a si ti langhternak le i “porhlawtnak” caah kan hmang lo. (1 Johan 2:​16) Ruakvuinak ah nuamhsaihnak tuah asiloah a man a fakmi ruakkuang tuah le mi hmuhnak ah aa dawhmi a si nakhnga tangka tampi hman kha kan duh lo.

• Ruakvuinak he aa tlaimi kan zumhnak kha midang cohlanter awkah kan i zuam lo. Mah he aa tlaiin “kan dihlak hin Pathian hmaiah kan kong kan i chim cio a herh lai” timi Baibal phunglam kha kan zulh. (Rom 14:12) Asinain caanṭha a um tikah kan zumhnak kong kha “nemnak le hmaizahnak in” fianter awkah kan i zuam.​—1 Peter 3:​16.

A Hmun: Chungkhar nih ruakvui pumhnak tuah dingin bia an khiah ahcun khoika ah dah kan tuah lai ti kha chungkhar hna nih an i thim khawh. Tahchunhnak ah, Biakinn, mithi inn, an inn, ruakkhanghnak asiloah thlan pawngah maw kan tuah lai ti kha an i thim khawh.

Pumhnak: Phungchimnak cu Baibal chimmi mithi kong le thawhṭhannak ruahchannak kong a si, mah in a tangmi chungkhar nih hnemhnak an hmu. (Johan 11:25; Rom 5:​12; 2 Peter 3:​13) Ruakvuinak ah a thimi nih a rak ngeihmi sining ṭha le a zumhfehnak in kan cawn khawhmi kong hna kha chim khawh a si.—2 Samuel 1:​17-​27.

Baibal ah hram aa bunhmi hla kha kan sa. (Kolose 3:​16) Hnemhnak a pemi thlacamnak in kan pumhnak kha kan donghter.​—Filipi 4:​6, 7.

Bul peknak: Ruakvui pumhnak ah tangka kan kholh hna lo. Cu bantukin Khrihfabu pumhnak hna zongah thawhlawm kholh a um lo.​—Matthai 10:8.

Aa pummi: Biakinn i tuahmi ruakvui pumhnak ah Jehovah Tehte a si lomi hna zong i tel khawh a si. A dang pumhnak hna bantukin ruakvui pumhnak zong zapi caah tuahmi a si.

Jehovah Tehte pakhat cio nih Baibal phunglam in cawnpiakmi an chiaṭha thleidannak lungthin cungah i hngat in kaa tel lai maw, tel lai lo ti kha biakhiahnak an tuah. (1 Timote 1:​19) Asinain Baibal phunglam he aa tlak lo tiah kan ruahmi biaknaklei puai hna ah cun kan i tel lo.​—2 Korin 6:​14-​17.