Jehovah Tehte Hna nih ṭhitumnak le i ṭhennak he aa tlaiin Baibal phunglam kha an zulh. Pathian nih nu le pa an i um tikah zungzal umṭi dingin a rak timhtuah. Baibal nih zuanzamnak ruang lawngah i ṭhennak nawl a awnh.​—Matthai 19:​5, 6, 9.

Lam tampi in an bawmh hna:

• Cauk. Kan cauk hna ah a fekmi chungkhar si awkah a bawmmi capar hna aa tel caah aa ṭhen dengmi nuva hna hmanh kha a bawmh khawh hna. Tahchunhnak ah, “Ṭhitum Biakamnak Kha Fehter,” “Zeitindah Ka Ngaihthiam Lai?” timi le “Pakhat le Pakhat cungah Zumhnak Ngeih Ṭhan Awkah i Zuam” timi capar hna kha zoh.

• Pumhnak. Chungkhar caah zulh awk a tlakmi Baibal ruahnak cheuhnak kong hna kha Jehovah Tehte Hna i Khrihfabu pumhnak, peng civui le pengkomh civui hna ah an i ruah.

• Khrihfa Upa. Khrihfa upa hna nih nuva hna kha Efesa 5:​22-​25 ti bantuk Baibal caang hna hmangin an bawmh hna.

An bawm hna lo. Nuva hna nih buaibainak tawnghthampiak awkah Khrihfa upa hna kha bawmhnak an hal hna hmanhah mah cu tuah u, mah kha tuah hlah u tiin tinak nawl an ngei lo. (Galati 6:5) Baibal phunglam zul loin aa ṭhenmi nih Khrihfabu ah tinvo sung hna kha a hmu lai lo. Cun Baibal phunglam ningin nupi, va ngeih ṭhannak nawl zong a ngei lo.​—1 Timote 3:​1, 5, 12.

Baibal nih chungkhar ah buaibainak a um hmanhah hmunkhat ah umṭi dingin tha a pek hna. (1 Korin 7:​10-​16) Buaibainak tampi cu lungtak in thlacamnak, Baibal phunglam zulhnak le dawtnak langhternak thawngin tawnghtham khawh a si.​—1 Korin 13:​4-8; Galati 5:​22.

Asinain a tanglei i langhtermi ṭih a nungmi thil sining hna ah Khrihfa nuva hna nih a dang tein um awkah bia an khiah:

• Chungkhar cawm duh lonak.​—1 Timote 5:8.

• Fakpi in velhnak.​—Salm 11:5.

• Pathian biaknak ah khenkham tuknak. Tahchunhnak ah, innchunghawi nih Pathian nawlbia buar dingin a hnek khawh men. Mah tikah thlerhkonh a simi innchunghawi nih ‘minung nakin Pathian nawl a ngaih’ khawh nakhnga a dang tein um awkah bia a khiah khawh men.​—Lamkaltu 5:​29.