Jehovah Tehte Hna cu biaknak aa hruhpimi kan si lo. Mah canah Jesuh Khrih nih a chiah takmi a keneh zulh awk le a cawnpiaknak ning in nun awkah a si khawh chung in aa zuammi Khrihfa kan si.

“Biaknak aa hruhpimi” timi kong he aa tlai in mi tampi nih a sullam phunphun in an chim. Asinain biaknak aa hruhpimi timi kong he aa tlaiin mi tampi nih an chimmi a kong pahnih le mah bantuk mi kan si lonak kong hi ruat hmanh.

• Biaknak aa hruhpimi timi cu buthar asiloah zumhpialmi biaknak tiah mi cheukhat nih an ruah. Jehovah Tehte Hna cu buthar kan si lo. Mah canah Baibal ah aa ṭialmi kumzabu pakhatnak Khrihfa hna i an cawnpiaknak le an tuahsernak tu kan i zohchun. (2 Timote 3:16, 17) Kan biaknak ah Baibal lawnglawng hi nawlngei bik a si awk a si tiah kan zumh.

• Biaknak aa hruhpimi timi cu mi pakhat nih a hruaimi ṭih a nungmi bu a si tiah mi cheukhat nih an ruah. Jehovah Tehte Hna nih aho minung hmanh kha an hruaitu in an cohlang hna lo. Jesuh nih a zultu hna sin i a chimmi mah phunglam hi kan zulh: “Messiah lawnglawng hi nan hruaitu cu a si ko.”​—Matthai 23:10.

Jehovah Tehte Hna cu biaknak aa hruhpimi ṭih a nungmi bu si loin bu chungmi hna le midang ṭhatnak a pemi bu an si. Tahchunhnak ah, phung kan chimmi nih zu le ritnak siivai ti bantuk ṭih a nungmi thil nih a leem cangmi hna hmanh kha i thlen awkah a bawmh hna. Vawlei pumpi ah relnak le ṭialnak tinṭan kan tuah i mah nih ca rel thiam awk le ṭial thiam awkah mi tampi kha a bawmh hna. Cun leiser ral a tongmi hna bawmhnak zong ah kan i tel. Jesuh nih a zultu pawl tuah awkah nawl a pekmi hna bantuk in kannih zong midang cungah ṭhatnak a chuahter hngami thil kha tuah kan i zuam.​—Matthai 5:13-16.