Jehovah Tehte Hna nih cheuhra cheukhat kan pe lo, kan rian cu min ṭial loin lungtho tein kan pekmi thawhlawm in ṭuanmi a si. Cheuhra cheukhat timi cu zeidah a si, zeicah Jehovah Tehte Hna nih kan pek lo?

Mi pakhat nih a ngeihmi thilri lakah cheuhra cheukhat a pek lai timi nawlbia cu Pathian nih hlanlio Israel miphun a rak pekmi hna Nawlbia lakah pakhat a si. Asinain, mah Nawlbia hna le “cheuhra cheukhat nan kholh hna lai” timi Nawlbia cu Khrihfa hna he aa pehtlaimi a si lo.​—Hebru 7:​5, 18; Kolose 2:​13, 14.

Cucaah Jehovah Tehte Hna nih cheuhra cheukhat le raithawinak kha kan pe lo, mah canah a hmasa Khrihfa hna bantukin kan phungchimnak rian kha lam hnih in kan ṭuan: man lo in phung kan chim i kan cawnpiak hnanak thawngin le lungtho tein thawhlawm kan peknak thawngin kan ṭuan.

Khrihfa hna caah ṭialmi mah Baibal lamhruainak hi kan zulh: “Nanmah le nan lungthin nan i thleh ning cio in rak tho u, nan thawh tikah i ngaihchih bu le hnekchom in si hlah seh, lunglawm tein a thomi kha Pathian nih a dawt hna.”​—2 Korin 9:7.