Mi chimmi: Siibawi te nih a kan damh kho lai lo tiah an ruah caah Jehovah Tehte Hna cu sii i thlop an duh lo.

 Biatak: Kanmah ca le kan chungkhar caah a ṭha bikmi siilei thlop ning kha kan kawl. Kan zawt tikah a thiammi le thi tel loin khuaihlai a duhmi siibawi kha kan fuh hna. Siilei thlop ning a ṭhanchomi kan hmuh tikah kan i lawm. Jehovah Tehte pakhatkhat a zawt tikah thi aa tel lomi siilei thlop ning a ṭhanchomi hi a caah bawmtu a si bantukin midang ca zong ah bawmtu a si ve. Ram tampi ah cun mizaw hna nih thi in chawnh khawhmi zawtnak, thisa dernak le thi rawnh i palh sual ti bantuk thi rawnh ruang i a chuak khomi zawtnak kha hrial awkah an i thim khawh cang.

 Mi chimmi: Jehovah Tehte Hna nih a zawmi kha zumhnak nih a damter khawh tiah an zumh.

 Biatak: Kannih cu zumhnak in mizaw damter kha kan hmang lo.

 Mi chimmi: Thi rawnh loin i thlop cu a dihmi a tam tuk.

 Biatak: Thi rawnh loin i thlop cu a dihmi a tlawm deuh. a

 Mi chimmi: Thi rawnh an duh lo caah ngakchia tel in Jehovah Tehte tampi cu kum fatin an thi.

 Biatak: Mah bia cu a si hrimhrim lomi a si. Pumhlaitu siibawi te nih minung lung le ruh an hlai tik le pum chung thilri an thlen tikah thi rawnh loin an tuah tawn. b Thi aa rawnh lomi ngakchia le mizaw cheukhat cu thi aa rawnhmi hna bantukin an dam asiloah anmah nakhmanh in an dam deuh caan a um tawn. c Zeiti a si hmanhah, mizaw pakhat cu thi aa rawnh lo ruangah a thi lai asiloah thi aa rawnh ruangah a nung lai tiah ahohmanh nih fiang tein an chim kho lo.

 Mah cu siilei he aa pehtlaimi si loin biaknak he aa pehtlaimi tu a si. Baibal chung i Biakam Hlun le Biakam Thar nih thi kha hrial awkah fiang tein nawl a kan pek. (Genesis 9:4; Levitikas 17:10; Deuteronomi 12:23; Lamkaltu 15:28, 29) Mah lengah, Pathian nih thi kha nunnak a aiawhtu in a hmuh. (Levitikas 17:14) Cucaah thi kan hrialmi cu Pathian nawl kan ngaih ruang lawng ah a si lo, Pathian kha nunnak Petu in kan upat ca zongah a si.

 Siilei he aa pehtlaimi bu hna nih thi rawnh hrialnak kha thi aa tel lomi siilei thlop ning ti zong in an auh, hlan ah cun mah kha a ṭhalo tukmi in le mahle mah i thah a si ti hmanh in an rak hmuh, asinain nai ah an hmuhning cu aa thleng. Tahchunhnak ah, 2004 ah, sii kong aa ṭialnak journal pakhat nih hitin a ti: “Jehovah Tehte a simi mizaw hna caah tuahmi siilei thlop ning tampi cu a hnuah mi zapi caah hman a si te lai.” d 2010 ah Heart, Lung and Circulation timi journal capar pakhat nih hitin a ti: “‘Thi rawnh loin khuaihlainak’ hi Jehovah Tehte Hna ca lawng ah a si tiah ti awk a si lo, pumhlaitu siibawi hna nih mah kha zei bantuk thil sining paoh ah hman ding in an ruah awk a si.”

 Atu ah vawleicung pumpi i siibawi tampi nih a buai ngaimi khuaihlainak kha thi rawnh loin tuah khawh awkah thi tam tuk chuah lo ding kilvennak lam kha an hman cang. Thi rawnh hau loin cutin i thlopnak kha a ṭhangcho liomi ram zong nih an hman i Jehovah Tehte a si lomi mizaw tampi zong nih cutin kan thlop u tiah an ti hna.