Jehovah Tehte Hna Nih Anmah Chuahmi Baibal An Ngei Maw?

AWNG

Jehovah Tehte Hna nih Baibal an hlathlai tikah a dang Baibal lehnak tampi kha an hman. Asinain holh phun tampi in leh a simi Vawlei Thar Lehnak Baibal kha a hleiin kan sunsak, zeicahtiah mah ah Pathian min hman a si, hmaan tein le fiang tein leh a si.

Pathian min an hman. Baibal lettu cheukhat nih Baibal Ṭialtu taktak, Pathian kha upatnak le thangṭhatnak an pe lo. Tahchunhnak ah, Baibal lehnak pakhat ah Baibal a chuah khawh nakhnga a bawmmi minung 70 leng i an min cazin kha biahmaiṭhi ah an telh. Asinain Baibal Ṭialtu taktak a simi Pathian min—Jehovah—kha cu an telh lo.

Vawlei Thar Lehnak Baibal ah cun a hrampi Baibal i Pathian min a umnak paohah Pathian min kha an telh. Asinain Baibal a lettu hna i an min kha an ṭial lo.
A Hmaan. Baibal lehnak dihlak nih a hrampi Baibal ningin an let dih lo. Tahchunhnak ah, Baibal lehnak pakhat nih Matthai 7:13 kha hitin a leh: “Hell ah a kalmi lam cu a kau i a fawi i mi tampi nih an zulh caah kutka bi chungah khan lut tuah u.” Asinain a hrampi Baibal ah cun “hell” si loin “rawhralnak” timi biafang kha a hman. Baibal a lettu hna nih miṭhalo cu hell mei ah zungzal in hrem an si lai ti an zumh caah “hell” timi biafang kha an telhmi a si men lai. Asinain mah zumhnak cu Baibal cawnpiaknak a si lo. Vawlei Thar Lehnak Baibal ah cun hmaan tein, hitin an leh: “Kutka bi ah lut u, rawhralnak a phakpitu kutka le lam cu a kau i cu lam i a kalmi cu tampi an si.”
A Fiang. A ṭhami ca lehnak timi cu a hmaan lawng si loin a fian zong a hau i hngalh a fawimi zong a si a hau. Mah tahchunhnak hi ruathmanh. Rom 12:11 chung i Paul nih a hmanmi biafang kha a biafang ningin leh ahcun “a tlawk thluahmahmi lungthin” ti a si. Mah biafang cu chanthar mi hna caah hngalhthiam awkah a har. Cucaah Vawlei Thar Lehnak Baibal ah Khrihfa hna nih “lungtho tein” an ṭuan awk a si timi hngalh a fawimi biafang kha a rak hman.

Vawlei Thar Lehnak Baibal ah Pathian min hman a si, hmaan tein le fiang tein leh a si, cun man loin kan pekṭhenh hna. Cucaah Baibal aa cawk kho lomi hna i tel in mi nuai tampi nih anmah holh tein Baibal kha an rel khawh.